„Спрега меѓу објавувачот на „бомбата“ и ВМРО-ДПМНЕ“ – така Генералниот секретар на владата го нарекува случајот со „М-НАВ“ и проблематичната набавка на нов АТМ софтвер за кој јавноста разбра преку објавен разговор снимен во неговата канцеларија. Драги Рашковски на денешната опсежна прес-конференција, засилена со видео-презентација, негираше каква било вмешаност во незаконски дејства за што вчера опозициската ВМРО-ДПМНЕ поднесе материјали до Јавното обвинителство.
Според Рашковски тој бил задолжен од Владата да се вклучи во деблокирање на ситуацијата и конечно имплементирање на договорот за набавка на нов софтвер за „М-НАВ“ – процес што почнал уште во 2013 година. Генералниот секретар тврди дека изборот на италијанската компанија „Леонардо“ е направен од претходно раководство на „М-НАВ“ предводено од Живко Попоски, татко на пратеникот на ВМРО-ДПМНЕ и поранешен министер за надворешни работи, Никола Попоски.
„Во 2013 Собранието носи закон за договор за заем за набавка на систем за надградба (АТМ систем) на „М-НАВ“. 7 пати се одлага реализацијата на надградбата. 5 и пол години се доцни со имплементацијата на надградбата. Пари се повлечени од ЕБОР (Европска банка за обнова и развој), а повеќе од 5 години ништо не е преземено. Тендерската спецификација е одобрена во 2014 година од Живко Поповски. Во втората фаза од постапката влегуваат фирмите Индра, Талес и Леонардо. На 30.05.2017 М-НАВ ја избира компанијата Леонардо за добавувач на опремата“,
изјави Рашковски.
Но, договорот со „Леонардо“ е потпишан на 14 декември 2018 година откако Рашковски е задолжен да го „менаџира“ проблемот и според опозицијата само неколку дена по состанокот чија содржина е објавена на rutube.ru.
Ако Генералниот секретар имаше брз одговор на сите технички прашања поврзани со процесот на набавка на софтвер за „М-НАВ“, тогаш тој неколку пати избегна да одговори на прашањето „Дали ќе си поднесе оставка за содржината на објавениот разговор“.
„Нема да поднесам оставка“,
кажа Рашковски по силното инсистирање конечно да даде одговор и по низата препирки со новинарите.
Тој најави кривична пријава против Климент Чепуњовски, разрешениот директор за техника во М-НАВ, кого го посочи како одговорен за неовластеното снимање на разговорот во неговиот кабинет. Рашковски ќе поднесе тужби за навреда и клевета против Иванка Василевска, член на ИК на ВМРО-ДПМНЕ, како и против новинарот Љупчо Златев, новинарот и доскорешен шеф на кампањата на Гордана Силјановска Давкова, Горан Момироски, против Љупчо Палевски и Миленко Неделковски.
Рашковски „до небо“ се извинува за навредите изречени во снимениот разговор
Генералниот секретар на Владата се извини за навредите што можеа да се слушнат во разговорот.
„Ја преземам обврската да се извинам кон сите држави и народи кои во негативна конотација беа споменати во разговорот. До небо се извинувам, пред се кон Италија, ромската заедница ако се нашла повредена, имам мал милиони семејни пријатели од ромската заедница“,
изјави Рашковски.