Генералниот секретар на Владата, Драги Рашковски, ја потврди најавата дека во вторник ќе одржи прес-конференција во врска со обвинувањата дека местел тендер за набавка на опрема во М-НАВ.
Тоа ќе биде негов прв јавен настап, откако на руска интернет страница беше објавен снимен разговор во неговиот кабинет од 2018 година, во кои се разговара за набавката на радарски систем за М-НАВ.
„ВМРО ДПМНЕ најверојатно не може да сфати дека не се тие кои ја определуваат динамиката на нашето дејствување. Кога веќе покажаа дека не разбираат англиски и не знаат што значи Letter of award, нека читаат дека уште завчера на македонски јазик е напишано дека во вторник ќе има прес конференција на оваа тема“,
напиша Драги Рашковски на Фејсбук
Реакцијата на Рашковски следува по денешната прес-конфенција на ВМРО-ДПМНЕ, во која опозициската партија прашуваше за сомнежите дека во разговорот договара „аванта“ од 7 милиони евра.
„Ако авантата од 7 милиони која чувме од медиумите дека Рашковски ја договара не е точна зошто тогаш чекорите кои Рашковски ги договара по кои италијанската фирма го добила тендерот се вистинити. Зошто на снимката на Рашковски се договараат кои заклучоци ќе се донесат и доколку се провери дали навистина се донеле вистината е поразителна за оваа криминална власт. Рашковски на снимката договара заклучок кој владата навистина го донела за што потврдуваат овие документи, и оттука имаме 10 прашања коишто треба да ги одговори Драги Рашковски.“
изјави денеска Иванка Василевска, член на ИК на ВМРО-ДПМНЕ.
Кои се двете страни на приказната
Од моментот кога беше објавен снимениот разговор од средбата во кабинетот на Рашковски, генералниот секретар на Фејсбук објави повеќе документи во кои ја презентира својата верзија на настаните. Тој тврди дека не станува збор за договарање за избор на најповолен понудувач, туку за динамика на испорака на веќе завршена постапка. Според Рашковски, тендерот датира од 2016 година, кога бил и избран најповолен понудувач. Но, од за него нејасни причини, никој не го потпишувал договорот за набавка на нов радарски систем, инаку финансирана од Европската банка за обнова и развој. Поради тоа, бил задолжен од Владата да го реши проблемот.
Разговорот е снимен од Климент Чепуњовски, разрешен директор на техника во МНАВ баш поради предизвикување на сериозен инцидент, за кој има извештај подготвен од Комитетот за воздухопловни несреќи… Снимката Климент Чепуњовски ја има предадено на висок функционер на опозициона партија пред неколку дена, откако дозна за извештајот во кој тој е посочен за виновен за случениот инцидент.
вели во своите статуси на Фејсбук, Драги Рашковски.
Тезата на ВМРО-ДПМНЕ се потпира на тврдењето дека договорот со италијанската компанија за која станува збор во разговорот е потпишан на 14.12.2018 година. Тоа, според опозицијата, се случило само два дена по состанокот во неговиот кабинет. Поради тоа, опозицијата бара и оставка од Рашковски. Но, барем на денешната прес-конференција ВМРО-ДПМНЕ беше внимателна во формулациите говорејќи за сомнежи и постави 10 прашања до Рашковски. Некои од нив се:
– Дали гласот кој се слуша на снимката е ваш и дали се слушате како на претсавниците на италијанската компанија им велите дека тие се добитници, но дека имало проблем со процедурата?
– Како е можно да биде доделен тендер на компанија со истечена тендерска документација?
– Го повлековте ли господине Рашковски заклучокот на владата за кој претседтелот на М-НАВ ви укажува дека е спорен?
– Кои закони и подзаконски акти Сугарески и неговиот шеф на кабинет ги испратиле во Собранието за изменување и што се требаше да се смени за да можете да го доделите тендерот на фирмата која посакувате?
– Зошто го криете од компаниите учеснички на тендерот наодот на Бирото за судски вештачења?
Одговорот на владејачката СДСМ на прозивките од опозицијата е на линија на она што го говори Рашковски. Дека во снимениот разговор не се договара тендер, туку динимака на реализација на веќе завршена, но не реализирана постапка.
„Дотаму е подготвена да оди опозициската ВМРО-ДПМНЕ што шурува и креира сценарија со луѓе кои биле спремни да ги загрозат животите и безбедноста на граѓаните… Како што и претходно беше објавено тендерот и изборот на најповолен понудувач се направени уште во 2016 година,а договорот за набавка на нов радарски систем, некој свесно го опструирал, загрозувајќи го животот и безбедноста на граѓаните, за што докази се доставени во надлежна институција. Вистината е дека поради неопходноста на опремата за нормално функционирање на авионскиот соообраќај, по налог на Владата е свикан состанок за утврдување на динамика за испорака“,
соопштија од СДСМ.
Случајот радарски систем во М-НАВ го отвори express.mk, во текст потпишан од Горан Момировски, долгогодишен новинар и доскорешен шеф на кампањата на кандидатотот за претседател на ВМРО-ДПМНЕ, Гордана Силјановска – Давкова. Написот содржи целосен транскрипт од разговорот во кабинетот на генералниот секретар Рашковски, како и интернет врска до аудио материјалот на rutube.ru.