„Бескрајна благодарност до сите, правда за Гоце, правда за мене, правда за нас. Апелацискиот суд Скопје ја преиначи казната за сообраќајната незгода кај ‘Млечен’ и одлучил Васил да оди 2 години во затвор и 2 години да не управува ПМВ, затоа што ми го одзеде најмилото“, реагираше оштетената Наташа Димитриевска која во оваа сообраќајка ги загуби сопругот и плодот, а и самата заврши со тешки повреди
Апелацискиот суд во Скопје ја преиначил пресудата за сообраќајката кај „Млечниот ресторан“ во Скопје во октомври 2018 година и наместо условна казна одлучила виновникот да добие две години затвор и исто толку забрана за управување возило.
Ваквата информација вечерва во гостувањето на ТВ 24 ја објави министерот за правда Бојан Маричиќ и потенцира дека информацијата треба да се потврди и официјално.
„Денес дознав дека Апелацискиот суд донел одлука со која ја преиначи одлуката за случајот ’Сообраќајката кај Млечен ресторан‘ и дал 2 години ефективен затвор и две години забрана за управување со моторно возило. Не знам дали е точно, ќе потврдат, информацијата ја добив од луѓе што се информирани“,
рече Маричиќ.
Во сообраќајката пред нешто повеќе од две години настрада млад брачен пар кој се возел на мотор по булеварот „Теодосиј Гологанов“ откако во нив удри автомобил. Загина младиот Гоце Димитриевски, а неговата сопруга, Наташа, го загуби плодот и заврши со тешки повреди.
За преиначување на пресудата преку социјалните мрежи се огласи и Наташа.
„Бескрајна благодарност до сите, правда за Гоце, правда за мене, правда за нас. Апелацискиот суд Скопје ја преиначи казната за сообраќајната незгода кај ‘Млечен’ и одлучил Васил да оди 2 години во затвор и 2 години да не управува ПМВ, затоа што ми го одзеде најмилото“,
напиша Димитриевска.
Бескрајна благодарност до сите,#правдазаГоце#правдазаМене#правдазаНас ,
— Natasha Dimitrievska (@napostoloska) February 9, 2021
Апелациониот суд Скопје ја преиначи казната за сообраќајната незгода кај Млечен и одлучил Васил да оди 2 години во затвор и 2 години да не управува пмв, затоа што ми го одзеде најмилото 🤍🤍
Кога беше објавена првостепената, условна пресуда, случајот „Млечен“ ја возбуди домашната јавност. Причината беше што виновник за сообраќајна незгода со смртни последици не е осуден на казна затвор.
Но, според истражувањето на „360 степени“, пресудата кај „Млечен“ не е исклучок туку правило. Односно, во најголемиот дел од случаите, кога виновниот возач признал вина и не бил под дејство на алкохол, казната била или условна или до една година затвор, дури и кога бил прегазен пешак на пешачки премин.
Претставки и за обвинителката и за судијката од Кривичен
Сопругата на жртвата, Наташа Димитриевска, по првостепената пресуда почна и правна битка и со обвинителството и со судот.
Таа поднесе претставка до Советот на јавни обвинители за постапувањето на обвинителката Снежана Бундалевска-Ѓорѓиевска, но Советот одлучи дека нема место за преземање никакви дејствија против неа.
Димитриевска сметаше дека во целиот случај има низа пропусти од страна на обвинителството. Самата постапка, вели, се водела предолго и не е направена соодветна квалификацијата на делото, односно обвинителката навела дека тоа е сторено од небрежност. Дополнително, како што вели, таа не повела постапка против осудениот за неукажување помош при сообраќајна незгода, а во обвинението не било запишано ниту дека во сообраќајката таа го изгубила плодот.
Откако поднесе претставка, во одговорот кој го доби од Советот пишува дека било побарано мислење и од Вишото јавно обвинителство Скопје кое направило увид, по што е заклучено дека се постапувало правилно и согласно законските прописи.
Паралелно, додека се водеше претставката од оштетената, течеше и постапката пред Апелацискиот суд, каде што Основното јавно обвинителство Скопје поднесе жалба и побара затворска казна.
Судскиот совет ја чека Апелација
Димитриевска поднесе претставка и до Судскиот совет против судијката Елена Илиевска-Јосифовиќ, а ова тело на јавна седница ја разгледуваше оваа точка, но одлучи да почека да се изјасни Апелацискиот суд. За да не се влијае и да не се прејудицира одлуката на второстепениот суд, која сега е донесена, членовите на Судскиот совет одлучија да гласаат да ја затворат претставката или да ја остават отворена додека за пресудата не одлучи и второстепениот суд. Во секој случај, нагласија ќе го следат предметот.
За случајот во декември 2020, мото-клубовите организираа и протест. На него порачаа дека тоа не е битка само за загинатиот Гоце туку и за почитување на сообраќајните прописи и судските одлуки. Освен моторџии, на протестот излегоа и други граѓани кои се приклучија со своите автомобили.