Од 145 милијарди долари што САД ги потрошија за обнова на Авганистан, 83 милијарди долари отидоа за војската и полицијата
Талибанците не само што ја освоија власта, туку и американските резерви на оружје, муниција, хеликоптери и друга опрема, наведува АП
Авганистанските безбедносни сили, иако обучувани и опремувани две децении, во кои беа инвестирани 83 милијарди долари, капитулираа толку брзо и целосно, некаде без ниту еден истрел, што покажува дека главните добитници од американските инвестиции се талибанците, проценува АП во својата анализа.
Не само што ја освоија власта, туку и американските резерви на оружје, муниција, хеликоптери и друга опрема, наведува американска агенција.
Американски воен претставник потврди во понеделникот дека талибанците добиле огромна количина воена опрема што САД му ја испратија на Авганистан, што, според агенцијата АП, е последица на лошата процена на силата на авганистанската армија, како и на пропусти на американската војска и на разузнавачките служби.
Неуспехот на Соединетите Држави да создадат силна авганистанска армија и полиција, како и причините за нивниот колапс, најверојатно, ќе бидат предмет на анализа во наредните години.
Ништо не укажуваше на она што се случи во Ирак. Армијата беше добро и модерно опремена, но немаше волја за борба, пишува АП.
„Не можете да купите сѐ со пари. Не можете да купите лидерство“,
изјави портпаролот на Пентагон, Џон Кирби.
Даг Лут, пензиониран генерал кој помогна во изготвувањето стратегија за Авганистан под водство на Џорџ В. Буш и Барак Обама, рече дека Авганистанците имаат материјални ресурси, но немаат нематеријални средства.
„Принципот на војната е следен: моралните фактори доминираат над материјалните. Моралот, дисциплината, лидерството, поврзаноста во единиците се многу поважни од бројот на војници и опрема. Како надворешни играчи во Авганистан можеме да обезбедиме материјални ресурси, но само Авганистанците можат да обезбедат нематеријални морални фактори“,
рече Лут.
Од друга страна, талибанците, кои се помали по број и имаат помалку софистицирана опрема и немаат воздухопловни сили, се покажаа како супериорна сила.
Американските разузнавачки служби во голема мера ја потценија нивната супериорност. Дури и кога американскиот претседател Џо Бајден најави повлекување на армијата во април, разузнавачките служби не предвидуваа дека талибанците ќе ја освојат власта толку брзо.
„Ако нашата стратегија не се базираше на надеж, ќе разберевме дека брзото повлекување на американската војска е сигнал за авганистанската армија дека е оставена сама“,
рече Крис Милер, кој беше вршител на должност министер за одбрана пред крајот на мандатот на Трамп.
Стивен Бидл, професор по меѓународни односи на Универзитетот Колумбија и поранешен советник на американските команданти во Авганистан, наведува дека објавата на Бајден предизвикала колапс.
„Проблемот со американското повлекување е што на сите им беше испратен сигнал дека е готово. Дури и пред објавувањето на Бајден во април, авганистанските сили губеа против талибанците, и кога дознаа дека американските партнери си заминуваат дома, импулсот за предавање без борба се прошири како пожар“,
рече Бидл.
Меѓутоа, неуспесите одат уште подалеку и подлабоко.
Соединетите Држави се обидоа да изградат кредибилна армија додека се бореа со талибанците, се обидоа да создадат поширока политичка основа за формирање влада во Кабул и да воспостават демократија во земја во која доминира корупцијата.
Со години американските воени лидери ги негираа проблемите и инсистираа дека ќе бидат успешни. Други, пак, насетуваа дека ќе се случи нешто лошо.
Крис Мејсон, професор на Институтот за стратегиски студии на Воениот колеџ, ја напиша книгата „Зошто авганистанските сили нема да издржат“ во 2015 година.
„Едноставно кажано, САД веќе отидоа во иста насока двапати: во Виетнам и во Ирак и нема причина да се мисли дека резултатите во Авганистан ќе бидат различни“,
напиша Мејсон.
Изградбата на авганистанската армија беше толку зависна од Соединетите Американски Држави, што војниците дури земаа плата директно од Пентагон. Честопати тие пари, како и големи количини гориво, одеа во рацете на корумпирани службеници кои направија „војници духови“ за да ја прикријат злоупотребата на пари.
Од 145 милијарди долари што САД ги потрошија за обнова на Авганистан, 83 милијарди долари отидоа за војската и полицијата. Соединетите Држави потрошија уште 837 милијарди долари во војната која започна во октомври 2001 година.
Средствата од 83 милијарди долари, кои беа инвестирани во авганистанските сили во текот на изминатите 20 години, се речиси двојно повеќе од минатогодишниот буџет за сите сили на американските маринци, заклучува агенцијата.