Потрагата по 29-годишното лице кое во попладневните часови на 29 јули исчезна во водите на вештачкото езеро Глажња во Липковскиот Регион, денес ја продолжуваат осуммина нуркачи од армиските специјалци „Волци“, соопшти ЦУК.
„Условите за потрага се многу тешки, брегот е исклучително стрмен, а длабочината на водата е повеќе од 20 метри на само неколку метри одалеченост од брегот. Видливоста е исто така лоша, особено на поголема длабочина“,
вели директорот на ЦУК, Стојанче Ангелов.
Од ЦУК информираат дека постојано се пребарува и брегот на езерото, а полицајци од СВР Куманово го обезбедуваат местото на несреќата.
Во потрагата беа вклучени и нуркачки тимови на Специјалната антитерористичка единица „Тигар“, а помагаат и активисти, здруженија, роднини и пријатели на исчезнатиот.
Исчезнатиот со иницијали Ф. Р. од селото Никуштак, според пријавата во МВР, влегол во водите на езерото кај браната „Глажња“ во Липково и не излегол оттаму.