Завршни зборови денеска дадоа дел од обвинетите, кои се изјаснија дека немаат сторено кривично дело во врска со уривањето на објектот „Космос“ и оти се надеваат на ослободителна пресуда
Пресудата за случајот ТНТ е закажана за 20 мај. Завршни зборови денеска дадоа дел од обвинетите, кои се изјаснија дека немаат сторено кривично дело во врска со уривањето на објектот „Космос“ и оти се надеваат на ослободителна пресуда.
Пред два дена, во завршните зборови, поранешниот министер за транспорт и врски Миле Јанакиески рече дека не постои ниту еден акт што е потпишан од негова страна, а се однесува на уривањето на објектот „Космос“ истакнувајќи дека се надева на ослободителна или одбивателна пресуда.
„Ако добијам и шеста осудителна пресуда, дали нешто ќе се смени во општеството? Мојот одговор е дека ништо нема да се подобри, освен што Цаноски ќе заработи од Буџетот на државата, давајќи поттик на други своето незаконско работење да го прикријат преку политички решенија користејќи ги правосудните органи“,
посочи Јанакиески.
Завршен збор вчера имаше и поранешниот градоначалник на Општина Гази Баба, Тони Трајковски, кој посочи дека на средба со инвеститорот на објектот „Космос“ Фијат Цаноски, тој не негира дека гради нелегално. Исто така, Трајковски вели дека нема испратено порака до Никола Груевски, ниту го контактирал во врска со овој објект и „повеќе од јасно е дека не бил поттикнат да дејствува по нечија наредба“.
Одбраната на поранешниот градоначалник на Општина Гази Баба предложи до Судот да обрне внимание на релевантните докази, бидејќи со ништо не се докажува вината на Трајковски и треба да биде ослободен од обвинение.
Јавниот обвинител Бурим Рустмеи во завршните зборови нагласи дека во текот на постапката со сигурност се докажа дека обвинетите ги сториле делата што им се ставаат на товар.
Обвинетиот Никола Груевски ја злоупотребил својата позиција и влијание како премиер да ја оствари својата желба да му го урне комплексот Космос на својот политички противник Фијат Цановски и да му нанесе финансиска штета. Јавниот обвинител Рустеми на судот му предложи обвинетите да ги прогласи за виновни и да ги казни согласно закон.
И бранителот по службена должност на обвинетиот Никола Груевски, во завршните зборови, негираше вина за Груевски, истакнувајќи дека тој ниту потпишал, ниту пак можел да потпише некаква одлука во Општина Гази Баба, истовремено оспорувајќи ја автентичноста на снимените аудиоразговори кои биле изнесени во случајот. Затоа побара тој да биде ослободен од обвинение.
Случајот ТНТ се однесува за уривањето на комплексот „Космос“ на инвеститорот Фијат Цановски.
За делото обвинети се повеќе лица меѓу кои ексминистерот за транспорт и врски Миле Јанакиески и тогашниот градоначалник на Општина Гази Баба Тони Трајковски, поранешниот премиер Никола Груевски, на кого му се суди во отсуство, како и еден градежен инспектор и тројца вработени во општина Гази Баба.