Ексминистерот побара ослободителна пресуда повикувајќи се на неколку аргументи. Од „бомбите“ чија автентичност ја призна, според него, не произлегува дека поттикнувал некого да се руши незаконски, се повика и на помилувањето од поранешниот претседател Ѓорге Иванов, но и на правно мислење од Никола Тупанчевски пред да стане министер за правда
Дали нешто ќе се подобри ако добијам и шеста осудителна пресуда? Ништо, освен што Фијат Цаноски ќе заработи фантастична сума пари како отштета од Буџетот, а ќе се даде и поттик и на други инвеститори своето незаконско работење да го прекриваат преку политика, порача ексминистерот за транспорт и врски Миле Јанакиески во своите заврши зборови за случајот ТНТ кој се однесува на рушењето на објектот „Космос“.
Поранешниот министер остана на тврдењето дека овој објект во 2011 година бил граден спротивно на одобрението за градба и биле прекршени законите со оглед дека инвеститорот излегол од предвидениот габарит. Јанакиески, кој ја призна автентичноста на „бомбите“ во овој случај, рече дека од разговорите не произлегува дека тој ги поттикнувал обвинетите – ексградоначалникот на Гази Баба Тони Трајковски и тогашната градежна инспекторка Елизабета в, незаконски да постапуваат во однос на рушењето на објектот.
„Треба ли во оваа постапка да одговарам затоа што сум кревал на телефон? Јас во критичниот период сум на годишен одмор и во тој период нема никаква моја комуникација со Тони Трајковски. За овој настан тврдам дека има поголем број аудиозаписи кои не се изведени овде пред судот, а одат во корист на одбраната. Дел се нудеа на црниот пазар и мене лично ми беа нудени. Јас одбив бидејќи не сакам да се занимавам со тоа“,
рече Јанакиески.
Токму „бомбите“ беа еден од шесте аргументи со кои Јанакиески побара судот да донесе одбивателна пресуда. Како што кажа, тој бил најприслушуваната личност во државата и за тоа сведочат 50 000 телефонски разговори и 150 000 СМС пораки. Но, во нив, вели ексминистерот, нема ниту еден разговор кој го инкриминира него и укажува дека поттикнувал некого.
„Дали ако Груевски ми пренесувал информации, тоа значи дека се руши од политички причини? Дали ако на претседател на владата во тоа време сум раскажал што имам информации значи дека сум поттикнал некого? Не смее да се толку секој разговор субјективно“,
рече Јанакиески.
Покрај „бомбите“ еден од шесте аргументи со кои денеска настапи поранешниот министер е и тоа што, како што вели, нема ниту еден документ кој тој го потпишал во врска со рушењето „Космос“, за што немал ниту надлежност.
Јанакиески се повика и на помилувањето од поранешниот претседател Ѓорге Иванов велејќи дека европска пракса е оти еднаш дадено помилување на смее да се повлече, но се повика и на актуелниот министер за правда Никола Тупанчевски. Нарекувајќи го еминентен професор, ексминистерот рече дека постои правно мислење од Тупанчевски дадено пред да стане министер, во кое тој наведува дека делото за кое се товари Јанакиески е застарено.
Меѓу аргументите зошто Јанакиески побара ослободителна пресуда е и тоа што, рече, има пресуди од Кривичен, Граѓански, Управен, Врховен суд итн., според кои „Космос“ бил дивоградба.
„ТНТ е пресудена работа бидејќи постојат 36 пресуди од сите судки инстанци. Согласно Европскиот суд за човекови права не може да се суди за пресудена работа“,
рече ексминистерот.
Како пример тој наведе и решение на Уставниот суд пред кој бизнисменот во 2011 година покренал иницијатива за прекршување на правата и слободите бидејќи бил политички дискриминиран и затоа му бил срушен објектот. Уставен, според тврдењата на Јанакиески во завршните зборови, одлучил дека не постојат докази дека Цаноски бил дискриминиран врз политичка основа.
Пред Јанакиески завршни зборови дадоа и неговите адвокати барајќи ослободителна пресуда. Исто така, зборуваше и адвокатот по службена должност на експремиерот Никола Груевски, Мехмет Сефери, кој побара неговиот клиент кој е првообвинет за злоупотреба на службената положба и овластување да биде ослободен од вина. И според одбраната на Груевски, „Космос“ се рушел според закон бидејќи објектот не бил граден според дадената градежна дозвола. Адвокатот побара и „бомбите“ да не бидат земени како доказ бидејќи, според него, тие може да се сечени и лепени.
Обвинителот Бурим Рустеми, пак, прв даде завршни зборови и побара затворски казни за обвинетите. За Јанакиески кој се гонеше за две дела поврзани со злоупотреба на службената положба, Рустеми се откажа од обвинението за едно од делата поврзано со злоупотреба на службената положба и овластувања во врска со тендерот за рушењето на објектот.
Ексградоначалникот на Гази Баба, Тони Трајковски, тогашната градежна инспекторка Елизабета Најдовска како и тројца службени лица од Општината, своите заврши зборови се очекува да ти дадат на наредните две рочишта закажани за утре и задутре. Потоа, ќе следува и закажување на рочиште за објавување на пресудата.
Миле Јанакиески / Фото: МИА