Акцијата следува откако минатиот месец, беше обзнането дека Внатрешната контрола на Министерството за внатрешни работи (МВР) истражува случај во кој вработени во управните служби на полицијата незаконски додавале категории во возачки дозволи на лица што никогаш не полагале за управување камион или автобус
Министерството за внатрешни работи (МВР) спроведува нова координирана акција поради сомненија за незаконско издавање и фалсификување возачки дозволи за Ц и Д категорија, односно за управување со товарно возило и автобус.
Од МВР потврдуваат дека акцијата е во тек и дека се вршат претреси на повеќе локации, со цел расчистување на случајот и обезбедување материјални докази.
„МВР денеска спроведува координирана акција со претреси на повеќе локации поради сомненија за незаконско издавање и фалсификување возачки дозволи за Ц и Д категорија“,
велат од Министерството, без да откријат повеќе детали за акцијата.
Дел од медиумите, повикувајќи се на иформации од свои извори, пишуваат дека претреси се вршат кај најмалку 25 лица, кои дел, како што објави „Слободен печат“ наводно се и приведени.
Според весникот, дел од приведените се вработени во МВР, дел управувале автобус со фласификувана возачка дозвола, а дел патувале со тешки товарни возила во надвор од Македонија, исто така, со фалсификувана возачка дозвола.
Акцијата следува откако минатиот месец, беше обзнането дека Внатрешната контрола на Министерството за внатрешни работи (МВР) истражува случај во кој вработени во управните служби на полицијата незаконски додавале категории во возачки дозволи на лица што никогаш не полагале за управување камион или автобус.
Според информациите, што тогаш ги објавија дел од медиумите, за незаконското додавање на Ц или Д-категорија наводно се наплаќале по 1 400 евра.
Од МВР тогаш соопштија дека од страна на Одделот за внатрешна контрола, криминалистички истраги и професионални стандарди при Министерството за случајот било известено надлежното Основно јавно обвинителство дека во координација со Обвинителството се преземаат соодветни активности за расчистување на случајот.
Телевизијата Сител, тогаш објави дека во групата која наводно била вклучена во издавањето лажни возачки дозволи има лица што претходно биле вмешани во аферата со лажни пасоши, откриена пред пет години.
Во тој случај десетмина вработени во МВР беа осудени на затворски и условни казни. Според пресудата, тие за издавање на лажните пасоши наплаќале по неколку илјади евра, а користеле податоци на македонски државјани кои никогаш немале извадено пасош, комбинирани со фотографии и податоци на странски државјани.
Министерот за внатрешни работи Панче Тошковски во телевизиско гостување на 27 август потврди дека полицијата постапува по информации за конкретни сомнежи за сторено кривично дело кои се споделени и со Обвинителството.
„Јавното обвинителство донесе наредба за преземање одредени истражни дејствија од страна на Внатрешната контрола во рамки на Министерството“,
рече тогаш Тошковски.
Говорејќи за случајот, тој рече дека секој што ја злоупотребил довербата на македонските граѓани и го оцрнил образот на Министерството за внатрешни работи (МВР) ќе биде најстрого санкциониран.