Министерството за внатрешни работи го испитува случајот со палењето на бугарското знаме на карневалот во Вевчани, информираше на денешната прес-конференција во Штип полицискиот портпарол Тони Ангеловски.
„Да, за жал имавме таков немил настан. Работиме на целосно расчистување на тој случај и очекуваме наскоро да биде расчистен“,
вели Ангеловски.
По палењето на бугарското знаме на карневалот во Вевчани, Софија упати вербален демарш, за што информираше бугарската министерката за надворешни работи Екатерина Захариева. Таа посочи дека на амбасадорот на Република Бугарија, Ангел Ангелов, му е порачано да го изрази пред Владата на Република Северна Македонија нивното силно негодување за тој чин.
Македонското Министерство за надворешни работи го осуди палењето на бугарското знаме на карневалот во Вевчани и оцени дека ваков чин е штетен по угледот на државата.
Палењето на бугарското знаме го осуди и градоначалникот на Општина Вевчани, Сашо Јанкоски.
Со кратка порака на Фејсбук, чинот го осуди и претседателот Стево Пендаровски.
„Палењето на знамето на Бугарија за време на карневалот во Вевчани е недопустливо и за осуда. Меѓу соседите е неопходно градење доверба, разбирање и почитување“,
порача Пендаровски.