Од Обвинителството велат дека Судот при одлучувањето треба да го земе предвид фактот дека изјавата со која се дава согласност понудениот имот да биде даден како гаранција, обвинетиот Дејан Јованов ја дал иако бил свесен дека дел од понудениот имот е предмет на извршување и ниту може да биде ставен под хипотека ниту да биде впаричен
Обвинителството изрази негативно мислење и побара да се одбие гаранцијата во износ од 12 милиони денари во недвижен имот, кој газдата на „Пулс“, Дејан Јованов-Деко, ја поднесе во рамки на постапката за пожарот во Кочани, за која утре истекува законски предвидената можност за да му се продолжи мерката притвор.
„Со предлогот се бараше од Судот да биде определена мерка гаранција во вкупен износ од 195 820 евра, во денарска противвредност од 12 042 932 денари, а која се состои во ставање хипотека на недвижен имот“,
велат од Обвинителството.
Сепак, велат оттаму, Судот при одлучувањето треба да го земе предвид фактот дека изјавата со која се дава согласност понудениот имот да биде даден како гаранција, Јованов ја дал иако бил свесен дека дел од понудениот имот е предмет на извршување и ниту може да биде ставен под хипотека ниту да биде впаричен.
„Освен тоа, понудените недвижности во голем дел се состојат од помошни простории, објекти, шупи, плевна, а кои претходно биле бесправни објекти и тој имот, при евентуална потреба, исклучително тешко ќе може да биде впаричен, а секако не во висина на износот на кој е проценет“,
додаваат од Обвинителството.
Газдата на „Пулс“, Дејан Јованов-Деко, требаше да излезе од притвор на 3 октомври, до кога му беше последното продолжување на притворот, со оглед на законската одредба дека може да ја издржува мерката најмногу една година од оцената на обвинителниот акт. Основното јавно обвинителство за гонење на организираниот криминал и корупцијата (ОЈО ГОКК) вчера информира дека е покрената нова истрага против Јованов, овој пат за кривичното дело давање поткуп, за кое исто така бара да му биде определена мерка притвор.