Моето искуство од изборите е дека Мила Царовска не бега од дебати, пишува пратеникот на ВМРО-ДПМНЕ
Мора да има јавна расправа за најавените реформи во основното образование, а најдобро место за тоа е Собранието, напиша денеска на Фејсбук пратеникот и секретар за меѓународна соработка на ВМРО-ДПМНЕ Тимчо Муцунски.
„Во недостаток на подготвеност за дијалог, спремност да се слушнат аргументите од било која друга страна и да се организира јавна расправа од страна на Министерството за образование и наука наша обврска како пратеници делегирани од граѓаните во Собранието на Македонија е да превземеме конкретен чекор што ќе биде во прилог на унапредување на квалитетот во реформскиот процес во образованието“,
нагласува Муцунски.
Тој посочува дека експертската јавност упатува на, како што вели, сериозни недоследности во предложената реформа.
„Моето искуство од изборите е дека Мила Царовска не бега од дебати. Затоа, ја чекаме таму каде што е избрана – во Собрание“,
пишува Муцунски, кој на изборите на 15 јули беше кандидиран за пратеник во првата изборна единица, исто како и Царовска, која беше втора на листата на СДСМ.