Од денешната средба, практично, зависи дали и за колку време ќе се пролонгира пописот, односно дали тоа би било за два месеца, за јуни, пред да бидат распишани локалните избори или евентуално за следната година, која не би требало да биде изборна
Има расположение кај Владата, според извори оттаму, за пролонгирање на пописот, додека да се вакцинираат попишувачите, и покрај првичните тврди позиции дека теренскиот дел од операцијата мора да се спроведе од 1 до 21 април, како што е предвидено со Законот за попис.
За можноста за одложување на пописот ќе се разговара на денешната средба на премиерот Зоран Заев со лидерот на ВМРО-ДПМНЕ Христијани Мицкоски, кој во изминатиот период излезе со повеќе предлози за друг термин на пописот.
Според информациите на „360 степени“, од денешната средба практично зависи дали и за колку време ќе се пролонгира пописот, односно дали тоа би било за два месеца, за јуни, пред да бидат распишани годинашниве локални избори или евентуално за следната година, која не би требало да биде изборна. Со оглед на тоа што изборите треба да се одржат во октомври, не е исклучена и можност за нивно пролонгирање за еден месец, во зависност од тоа дали и каков договор ќе се постигне за пописот.
Според официјалните најави, тема на денешната средба ќе бидат и измените на Изборниот законик, за што ВМРО-ДПМНЕ веќе излезе со предлог локалните избори да се одржат во еден круг, што не беше прифатливо за СДСМ пред дополнителните избори за градоначалници и за советници во Штип и во Пласница минатата година. Од друга страна, СДСМ останува на предлогот за воведување една изборна единица за парламентарни избори, наместо сегашните шест. Се очекува и договор за употреба на скенерите за отпечатоци од прст на претстојните локални избори, а Заев најави дека ќе разговара со Мицкоски и за законите што се блокирани во парламентот.
Доколку има договор за пролонгирање на пописот, ќе бидат потребни измени на Законот за попис, во чие донесување не учествуваше ВМРО-ДПМНЕ, која, пак, неодамна го поднесе во Собранието предлогот за поништување на Законот за пописот 2021.
Локалните избори, пак, треба да бидат распишани летоска, а во случај да дојде до нивно пролонгирање, исто така, ќе треба да се прават законски измени.
Од друга страна, и да има договор меѓу Заев и Мицкоски за пролонгирање на пописот, за тоа исто така ќе треба да се консултираат и другите парламентарни партии. пред се партиите од албанскиот блок, кои првиот вицепремиер и секретар на ДУИ Артан Груби не успеа да ги собере денеска на иста маса.
Во петокот, по телефонскиот разговор со американскиот дипломат Метју Палмер, Мицкоски се закани дека „силата раѓа сила“, односно дека земјата ќе влезе во политичка криза, ако власта продолжи, според него, насила да го турка пописот. Наспроти тоа, како што соопштија од Амбасадата на САД, Палмер ги охрабрил Мицкоски и ВМРО-ДПМНЕ да соработуваат за решавање на предизвиците со кои се соочува земјата, вклучително со надминување на разликите со Бугарија и обезбедување успешен попис на населението, што е, како што се наведува, важна статистичка алатка за да се обезбеди подобро управување.
Претходно, Заев изјави дека очекува поддршка од ВМРО-ДПМНЕ и Христијан Мицкоски за спроведување на пописот доколку се вакцинираат попишувачите, кои, како што нагласи, секако се планирани во првата категорија граѓани за имунизација.