Од бугарското Министерство за надворешни работи додаваат оти реакцијата на властите во земјава на ваквиот и други случаи на злосторства од омраза ќе биде показател за сериозноста што владата во Скопје ја придава на градењето добрососедски односи и на процесот на пристапување во ЕУ
Бугарското Министерство за надворешни работи (МНР) попладнево преку писмена реакција на својата веб-страница изрази најостра осуда за демолирањето на бугарскиот клуб „Цар Борис Трети“ во Охрид и порача дека со овој чин на злосторство е извршена уште една омраза врз Бугарите во земјава.
Според заедничкиот протокол од 2017 година, додаваат од бугарското МНР, Скопје изречно се обврзува да ги гарантира правата на Бугарите, со цел да се обезбеди ефективен пристап до еднакви права, заштита од дискриминација и зачувување на културата и идентитетот на бугарската заедница.
„Она што се случува треба да се разгледа во контекст на обидот за палење на клубот ‘Иван Михајлов’ во Битола и хероизацијата на неговиот сторител, повиците за откажување од Договорот за добрососедство со Бугарија, на ескалирачкиот говор на омраза во медиумскиот простор и социјалните мрежи во Северна Македонија, агресивната јавна кампања против бугарските културни клубови, како и на законски измени кои ја загрозуваат слободата на здружување на Бугарите во соседната земја“,
се наведува во соопштението од МНР на Бугарија.
Оттаму додаваат оти имињата на бугарските клубови во земјава не се причина за оваа „кампања“, а во оваа насока како значајно го истакнаа тоа што лидерот на најголемата опозициска партија (Христијан Мицкоски) отворено повикува на, како што велат, затворање на бугаските клубови, без разлика какво име носат.
„Очигледно е дека во Северна Македонија се уште постои проблем со слободното изразување на бугарскиот идентитет“,
наведуваат од бугарското МНР и додаваат дека ваквите акции намерно ги попречуваат напорите за зајакнување на пријателството, добрососедството и соработката во односите меѓу Бугарија и Северна Македонија.
Министерството изрази уверување дека македонското МНР ќе има навремена и соодветна реакција во однос на нападот врз бугарскиот клуб, бидејќи, како што се посочува, меѓу надворешнополитичките институции на двете земји постои конструктивен дијалог.
„Но, очекуваме дека овој дијалог ќе ги вклучи и другите институции во соседната земја со конкретни активности. Неопходно е навремено да преземат мерки за откривање и изведување пред лицето на правдата на сторителите на делото врз културниот клуб ‘Цар Борис Трети’. Систематското отсуство на вистинска реакција создава чувство на неказнивост и на тој начин поттикнува умножување на овие манифестации“,
се додава во реакцијата на бугарското Министерство.
Од Министерството додаваат оти реакцијата на властите во земјава на ваквиот и други случаи на злосторства од омраза ќе биде показател за сериозноста што владата во Скопје ја придава на градењето добрососедски односи и на процесот на пристапување во ЕУ.
Бугарските медиуми денеска објавија дека просториите на граѓанското здружение „Цар Борис Трети“ во Охрид се повторно демолирани, откако пред повеќе од еден месец беше оштетена таблата на која е испишано името на клубот.