Според Мицкоски, токму поради владините политики и, како што рече, изнудени решенија, се случува рафтовите да се празни и граѓаните на располагање да го немаат лебот како основен производ
Граѓаните треба да го добијат лебот кој е основен прехранбен производ по најниска цена, изјави денеска претседателот на ВМРО-ДПМНЕ, Христијан Мицкоски.
Според него, лошите политики на Владата довеле до празни рафтови за леб.
„За жал, егзибиционистичките и лошите политики на оваа влада, големата инфлација, рекордна во Европа, Македонија има двојно повисока инфлација споредено со ЕУ, доведе до тоа, покрај тоа што пред неколку месеци имаше редици за нафта и бензин, денеска да имаме празни рафтови за леб“,
изјави Мицкоски одговарајќи на новинарско прашање по отворањето на спортската сала во населено место Стајковци во Општина Гази Баба.
Според Мицкоски, токму поради владините политики и, како што рече, изнудени решенија, се случува рафтовите да се празни и граѓаните на располагање да го немаат лебот како основен производ.
Владата вчера донесе одлука со која производителите и трговците имаат обврска да произведуваат и продаваат леб по замрзната цена. Со одлуката на Владата се определува обврска за трговците што претставуваат правни и физички лица, кои се регистрирани за вршење трговска дејност во соодветен регистар согласно закон, како и трговците што претставуваат правни и физички лица регистрирани за вршење производство, кои своите производи ги продаваат на пазарот во сопствени продавници или на други трговци на големо и мало со прехранбени производи, да прибавуваат и/или да продаваат леб бел и полубел (сечен на парчиња или цел).
По ваквата одлука, која стапи во сила вчера, пекарите денеска одлучија да ја почитуваат истата, односно да произведуваат и дистрибуираат леб по замзрната цена, но, како што најавија, битката против владините одлуки ќе ја водат на суд.