Потпретседателот на ВМРО-ДПМНЕ и претседател на собраниската Комисија за транспорт и врски вели дека би било добро Законот што доби вето да се врати во матичното тело во парламентот, пред да оди на ново гласање на пленарна седница
Добро е да има широка расправа за регулативата за бесправно изградени објекти, независно од тоа дали Владата ќе поднесе нов закон или ќе се оди на прегласување на Законот што не го потпиша Пендаровски, вели потпретседателот на ВМРО-ДПМНЕ Владо Мисајловски, кој е претседател на матичната собраниска Комисија за транспорт и врски.
Во изјава за „360 степени“, Мисајловски вели дека нема информации дали Законот што не го потпиша претседателот Стево Пендаровски ќе се врати во Комисијата за транспорт и врски, каде што би можеле да се поднесат амандмани на оспорените членови или ќе оди во „трето читање“ директно на пленарна седница.
„Од претседателот на Собранието зависи дали ќе го стави Законот директно на пленарна седница. Според мое мислење, добро е Законот да се врати во матичната Комисија и да се слушнат мислењата на сите пратенички групи и евентуално да се интервенира амандмански во оспорените одредби. Мое лично мислење е и дека ќе беше подобро овој Закон да се носи во редовна наместо во скратена постапка, зашто на тој начин ќе се овозможеше да се слушнат повеќе и различни мислења и ќе се избегнеа дел од реакциите. Затоа и сметам дека е потребна јавна дебата, зошто нема друг начин за подобрување на текстот на законот“,
вели Мисајловски.
Министерот за транспорт и врски Благој Бочварски вчера отвори дебата за решението на кое шефот на државата стави вето, а кое беше изгласано со 72 гласа „за“ од пратеници на владејачките СДСМ и ДУИ и на опозициската ВМРО-ДПМНЕ.
Бочварски денеска продолжи со, како што вели, отворената консултација за Законот за утврдување на правен статус на бесправно изградените објекти. Тој оствари работна средба со Комората на овластени архитекти и инженери, како и со граѓанските здруженија „О2“ и „Фронт 21/42“.
„Разговаравме за подобрување на Законот и сметам дека сме во добра насока сите заеднички да креираме законско решение кое ќе понуди фер можности за утврдување правен статус на бесправно изградените објекти. Сите предлози внимателно ќе ги анализираме и сè што е конструктивно решение ќе инкорпорираме во Законот, а притоа ќе водиме сметка да го заштитиме јавниот интерес“,
вели Бочварски.
Од пратеничката група на ВМРО-ДПМНЕ велат дека сега Владата треба да одлучи дали ќе подготви нов закон или, пак, Собранието ќе го потврди решението што беше изгласано овој месец, а кое предизвика многу реакции во јавноста, а беше оспорено и од дел пратеници од помалите партии од коалицијата на СДСМ. Како што се посочува, Владата сега не може да го повлече неодамна донесениот Закон што Пендаровски го врати во Собранието, ама може да поднесе друг закон откако тој што доби вето би бил потврден во парламентот во „трето читање“.
Џафери има рок до 14 јуни да го стави на повторно разгледување законот за дивоградбите, откако Пендаровски соопшти дека нема да го потпишува указот за негово стапување на сила. Според најавите, Законот би се нашол на дневен ред на првата нова седница на парламентот што се планира за 8 јуни. Ако тогаш биде усвоен повторно, со најмалку 61 глас, претседателот ќе биде обврзан да стави потпис.