Според нејзиниот исказ, противпожарни апарати биле поставени кај главниот влез, кај бината и кај шанковите, додека панични светла имало на сите излезни врати
„Забележав човек што раководеше со нив (пиротехничките средства н.з.) Секогаш од десната страна на бината имаше поставено нешто како кутија, а надвор, пред вратата, сум видела комбе со натпис ‘Пиротехника’“, рече Магделена-Јованова на денешното рочиште, каде што даде исказ како сведок на одбраната
Во т.н. кабаре „Пулс“ имало противпожарни апарати, знаци за излез и функционални „панични светла“, а на претходни настани се употребувала пиротехника. Ова во своето сведочење го кажа Магдалена Јованова, ќерка на првообвинетиот Дејан Јованов, на денешното судско рочиште за трагедијата во Кочани во која загинаа 63 лица, а повеќе од 200 беа повредени.

Одговарајќи на прашања на адвокатката Ивана Коцевска, која го застапува нејзиниот татко, Јованова истакна дека никогаш не се мешала во работењето на клубот, дека била само посетителка и оти критичната вечер на 16 март минатата година не била во објектот. Покрај нејзиниот татко Дејан, во овој предмет се обвинети и нејзиниот брат Михајло Јованов и чичкото Тодор Јованов.
Јованова наведе дека во клубот почнала да оди во 2018 година, а во 2024 година биле отстранети галериите и било додадено ново осветлување. Според нејзиниот исказ, противпожарни апарати биле поставени кај главниот влез, кај бината и кај шанковите, додека панични светла имало на сите излезни врати.
„Панични светла имаше и на задната врата, на вратата за излез, како и на вратата кај билетарницата“,
рече Јованова додавајќи дека при еден прекин на струја тие се вклучиле.
Таа потврди дека на претходни настани, како родендени и отворања, во објектот се користела пиротехника, опишувајќи го лицето што раководело со неа како „средно висок, полничок и малку ќелав човек“.
„Забележав човек што раководеше со нив. Секогаш од десната страна на бината имаше поставено нешто како кутија, а надвор, пред вратата, сум видела комбе со натпис ‘Пиротехника’“, .
изјави сведокот, пренесе МИА.
На прашања на одбраната, Јованова рече и дека при нејзините посети често затекнувала полиција која легитимирала гости и го контролирала влезот и излезот.
Вкрстено испрашување и одбиени прашања од судот
Одговарајќи на вкрстени прашања на Јавното обвинителство, таа посочи дека задната врата за излез и пушење цигари ја користеле сите гости и дека таму никогаш не видела обезбедување. Негираше дека работела во т.н. кабаре, но призна дека објектот го посетувала пред полноќ и пред да наполни 18 години.
„Не сум била во диско пред да наполнам 18 години, по полноќ. Немам такви фотографии. Но, пред полноќ сум била. Никогаш не сум се мешала во работата на татко ми“,
кажа Јованова.
Судечкиот совет не ги дозволи прашањата на обвинителите за тоа кој ги администрирал профилите на „Пулс“ на социјалните мрежи, дали Јованова учествувала во преземањето на последната лиценца од Министерството за економија во 2024 година ниту, пак, дали познава лице по име Вили вработено во тоа министерство.
Столар сведочеше за уредувањето на ентериерот без писмен договор
На денешното рочиште исказ даде и столарот Сашко Зафиров, кој работел на уредување на ентериерот во 2012 и во 2024 година. Тој изјави дека Дејан Јованов го ангажирал усно, без писмен договор или документација, а негова задача била да ги обложи веќе поставените метални конструкции со дрво, иверица и фурнир.

„Кога јас влегов, 90 проценти од работите веќе беа завршени. Зборувам за 2012 година, конструкцијата беше целосно направена. Јас бев еден од последните мајстори за да ги поставам панелите и да ги зашрафам“,
сведочеше Зафиров.
Според него, во 2012 година плановите и скиците на браварите им ги давало друго младо лице, а не првообвинетиот, додека во 2024 година тој вршел само доработка на клупите во сепарињата со водоотпорни панели, без зафати на покривната конструкција.
Седум нови сведоци на одбраната за следното рочиште
Одбраната на првообвинетиот за наредното рочиште предложи седум нови сведоци: Анастасија Соколова – вработена во „Пулс“; Костадин Поп Христов – пиротехничар ангажиран од Дејан Јованов; Горан Игновски – соработник на групата ДНК; Бојан Спасовски – угостител од Гевгелија; Димитар Граменов – вработен во противпожарната служба, Дејан Стојанов – сведок за околностите околу внатрешното уредување и Марјан Зафиров – еден од првите вработени во клубот.
Судскиот процес го води судијката Дијана Груевска-Илиевска, а обвинението го застапува тим од 15 јавни обвинители. Судењето почна на 19 ноември 2025 година, осум месеци по трагичниот пожар од 16 март за време на настапот на групата ДНК, во кој загинаа 63 лица, а над 200 беа повредени.
