Министерската позиција за труд и социјална политика останува празна, откако ВМРО-ДПМНЕ одлучи да не предложи наследник на Рашела Мизрахи, која беше разрешена поради прес конференциите пред таблата во Министерството со старото државно име.
Лидерот на опозицијата Христијан Мицкоски попладнево изјави дека се одлучиле на таков чекор затоа што, како што рече, опозицијата не сака да учествува во игрите на Зоран Заев и Оливер Спасовски.
„Тоа беше една процедура во којашто слугата на Заев, Оливер Спасовски, на начин на којшто ги прекрши сите закони и политички договори, се обиде да го затскрие моментот кога јавноста, а и пратениците слушаа како всушност Зоран Заев го советувал Бојан Јовановски, како објаснува дека знаел за делувањето на Меѓународнот сојуз и ја помагал работата на телевизијата. Сетоа тоа се обиде да го сокрие со смената на најдобриот министер во владата Рашела Мизрахи. Ние тој чин не го признаваме и немаме намера да бидеме дел од оваа игра на којашто основен сценарист е Зоран Заев, а извршител Спасовски. “
изјави Мицкоски на прес конференцијата по распуштањето на Собранието.
Мизрахи беше разрешена на предлог на техничкиот премиер Оливер Спасовски, кој денеска упати и јавен апел до опозицијата да предложи наследник за Мизрахи за како што рече, да даде свој придонес за организирање фер избори и остварување на европската интеграција на државата.
Сега министерското столче во министерството за правда ќе остане празно, се до завршување на изборите, односно до формирањето на новата влада. Дел од пратениците од СДСМ претходно најавија дека ако ВМРО-ДПМНЕ не предложи наследник за Мизрахи, со овој ресор до изборите би раководела дополнителната заменик-министерка Санела Шкријељ, која е предлог на социјалдемократите. По изборите, пак, како што е предвидено со законите за влада и за избори, раководењето со овој ресор го презема редовниот заменик-министер, се до изборот на новата влада. Тоа во случајот е Ѓонул Бајрактар.