Шефот на бугарската дипломатија вчера од Брисел, каде што учествуваше на НАТО-министерскиот состанок, изјави дека и Бугарија сака да биде дел од процесот околу уставните измени во Македонија. По однос на ова прашање, тој кажа дека имал и краток разговор со шефот на македонската дипломатија Бујар Османи. Реакција за изјавата на Милков стигна од македонскиот државен врв
Македонските Бугари мора конечно да добијат еднаквост, изјави денеска техничкиот министер за надворешни работи на Бугарија, Николај Милков, откако вчера изјави дека Бугарија треба да биде вклучена во процесот на уставни измени во Северна Македонија.
„За жал, нема напредок. Дури неодамна темата стана предмет на внатрешна расправа за промена на Уставот на РСМ. Ја поздравуваме земјата поради ова. Успешното завршување на овој процес ќе даде поттик за почеток на преговорите за членство во Европската унија. Процесот на промена на Уставот е внатрешен. Проблемот е што сигналите не се недвосмислени. Токму поради контроверзната природа на прашањето, Бугарија треба со зголемен интерес да ја следи оваа тема“,
изјави Милков, пренесува бугарската агенција Фокус.
За нас е од најголема важност да обезбедиме еднакви права на бугарскиот народ со другите народи во РСМ, нагласи Милков.
„Сакаме да избегнеме сценарија во кои одлуките се договараат со земјите членки на ЕУ, зад грбот на Бугарија, а потоа се врши притисок на нашата земја. Бугарија нема да прифати ниту една формулација со која на Бугарите им се доделува статус кој е различен од оној на претставниците на другите народи во РСМ. Македонските Бугари конечно мора да добијат еднаквост во секој поглед. Се надеваме дека РСМ ќе вложи повеќе напори за прекин на антибугарската реторика, за двете страни да водат нормален дијалог“,
посочи министерот.
Шефот на бугарската дипломатија вчера од Брисел, каде што учествуваше на НАТО-министерскиот состанок, изјави дека и Бугарија сака да биде дел од процесот околу уставните измени во Македонија. По однос на ова прашање, тој кажа дека имал и краток разговор со шефот на македонската дипломатија Бујар Османи.
Од МНР му одговорија дека процесот на уставни измени е внатрешно прашање на Република Северна Македонија за кое одлучува Собранието и согласно тоа, не постои ниту можност ниту, пак, политичка волја во него да бидат вклучени граѓани или институции од странство, вклучително и од Република Бугарија.
Претседателот Стево Пендаровски, барањето на Софија за учество во процесот на уставните измени кои земјава треба да ги направи за да ги продолжи преговорите со Европската Унија, го оцени како скандалозно и посочи дека „такви барања не упатуваат ниту окупаторите кон земјите, териториите или државите кои ги окупираат“.
„Во 21 век е непримерено да барате да се мешате во внатрешните политички и уставноправни процеси на која било држава. Во таа смисла, мислам дека нашиот одговор преку МНР вчера беше на место“,
рече Пендаровски.
Реагираше и премиерот Димитар Ковачевски кој нагласи дека „одлучувањето и целата работа е исклучиво во надлежност на нашите институции и нашата држава“.