Апасиев смета дека, покрај двата потврдени мандати, на Левица ѝ следуваат уште три пратенички места
Дури 425 приговори на резултатите од предвремените парламентарни избори во средата поднела Левица до Државната Изборна Комисија (ДИК).
Од партијата која првпат обезбеди место во парламентот – со двајца пратеници најавуваат уште приговори во текот на денот – до истек на рокот за приговарање по овој основ – вечерва во 19.30 часот.
Идниот пратеник Димитар Апасиев смета дека, покрај двата потврдени мандати, на Левица ѝ следуваат уште три пратенички места.
Од партијата обвинуваат за бројни нерегуларности во процесот на броење и сумирање на резултатите од гласањето, како и по добиените информации за направени манипулации и фалсификати. Приговорите се однесуваат на голем дел од избирачките места во повеќе изборни единици во кои набљудувачи на партијата, но и други лица кои непосредно беа сведоци на броењето на гласовите, какошто се соопштува, дале информации за манипулации спроведени од страна на лица на ДИК.
ДИК од утре до вторник ќе одлучува по приговорите што се поднесени. Во текот на вчерашниот ден пристигнаа вкупно 82 приговори, главно, за гласањето, а најмногу од Алијансата за Албанците.