Уште 77 приговори за изборите на 15 јули стигнале во Државната изборна комисија попладнево, така што вкупната бројка засега е 82 – на два часа пред истекот на рокот во кој учесниците во изборниот процес може да приговараат за гласањето.
Како што информираа од ДИК, засега најмногу приговори поднела Алијансата на Албанците – 74, еден е од Глас за Македонија, додека два се од ВМРО-ДПМНЕ, за кои се посочува дека се за сумирање на резултатите.
Доцна попладнево, од ВМРО-ДПМНЕ побараа да се пребројат гласачките ливчиња, посочувајќи дека е голема бројката на неважечки ливчиња и тоа во најголем дел во случаи каде што се гласало за коалицијата „Обнова“.
Приговори за постапката на гласање може да се поднесуваат до 21 часот вечерва, додека за сумирањето и утврдувањето на резултатите до утре до 19 часот и 30 минути.
Роковите почнаа да течат синоќа, кога беа објавени неофицијалните конечни резултати.
Првите пет приговори беа од партии што не обезбедија влез во новиот парламент. Два приговори поднесе партијата Демократи, а кои се однесуваат за неважечките гласачки ливчиња. По еден приговор поднеле и Работничка партија – МОРО, СДУ и Интегра.