На 22 март Македонија го регистрираше првиот смртен случај од ковид-19. Жртвата беше 57-годишна жена од Куманово, која починала во изминатото деноноќие.
Од тој момент до вчера, во земјава се регистрирани вкупно 104 смртни случаи како последица на ковид-19. Но, дали бројките растат, опаѓаат или стагнираат?
Топло-ладно
Тој 22 март, кога земјата ја регистрираше првата жртва од коронавирусот, беше ден недела. Па, според денот на првиот случај, ги собравме и ги подредивме бројките на смртни случаи на неделно ниво до последната сабота (16 мај 2020 г.)
Статистиката вели дека во првите седум дена, вклучувајќи го и оној кога е регистрирана првата жртва, бројот на починати од ковид-19 изнесувал 4 лица. До крајот на третата недела, бројката расте до 17 починати за една недела. Во следните две недели, трендот почна да покажува надолна линија, за во шестата недела да се случи „експлозија“ од 23 починати за седум дена. Во таа седмица е и 27 април, кога за едно деноноќие беа регистрирани рекорден број на починати од коронавирусот – дури 6.
Од таа недела, бројките се вратија „по старо“ и повторно трендот бележи надолна линија. Вкупно седумте починати во изминатата, осма недела од првиот смртен случај, е и вториот најнизок црн биланс од почетокот на епидемијата во земјава.
Но, повторно, за само два дена (вчера и завчера) има 6 нови смртни случаи, што значи дека треба да се очекува повторно враќање на полоши бројки.
Во споредба со регионот
Како помина земјава споредено со регионот е тема на која подолго време се води активна дебата. Опозицијата и дел од медиумите ја истакнуваат бројката на починати на милион жители, како доказ дека Македонија полошо се справила со кризата од соседите.
Таа бројка, според интернет-страницата „Ворлдометерс“, изнесува 50 жртви на 1 милион жители. И, точно е дека ако се земе во предвид само бројот на жртвите според населението, Македонија се покажала полошо од регионот, правејќи си „друштво“ со Словенија и со Турција. Далеку подобри од земјава, ако еднострано се следи оваа статистика, се Србија, Хрватска, Бугарија, Грција а најдобра од сите е Албанија, која регистрирала само 11 смртни случаи на 1 милион жители. Но, на крајот, ако за репер може да се земе само оваа статистика, целиот регион треба да биде горд бидејќи фалената Германија е двојно полоша од Македонија, со близу 100 жртви на 1 милион жители.
Заклучокот кој логично се наметнува е дека е нормално во Германија да има повеќе починати на 1 милион жители, кога имало повеќе заразени од ковид-19. Но, ако тоа важи за Германија, тогаш важи и за сите останати. Поради тоа, во споредбата со регионот го зедовме вториот клучен податок – број на починати од бројот на заразени лица.
Резултатот покажува дека најголем процент на смртни исходи во регионот, кај пациенти дијагностицирани со ковид-19, има во Словенија – 7,1%. Потоа следи Грција со 5,8%, па Македонија со 5,7%, а не толку далеку е и Бугарија со 4,9% и Хрватска со 4,3% починати од заразените од коронавирусот. Германија на пример, по оваа статистика е на средината. Во 4,6% од случаите тамошните доктори не успеале да ги спасат ковид-19 пациентите. Далеку од германскиот, но и просекот во регионот се Албанија, Турција а особено Србија. Тоа значи дека или овие земји развиле подобар начин за лекување на пациентите болни од ковид-19 или, пак, дека различно ја водат медицинската евиденција.
Наместо заклучок – предупредување
Процентот на починати од заразени пациенти и самиот не ја дава целосната слика – колку добро одреден здравствен систем се справил со ковид-19 кризата. Како што покажаа примерите од богатите држави како Белгија, Франција, Шпанија, Италија и други, смртноста зависи од тоа дали ќе бидат надминати капацитетите на локалниот здравствен систем, каква е старосната структура на населението и други фактори. Во тој поглед, Македонија не се разликува многу од регионалниот просек.
Но, она по што земјава реално се разликува од регионот е што има нешто повисок број на дијагностицирани пациенти со ковид-19 на милион жители, поради што и има поголем број на смртни случаи на милион жители. Тие бројки не зависат толку од реакцијата на здравствените власти, туку од мерките на извршната власт, нивното спроведување и пред сѐ – одговорното однесување на секој поединец во општеството.
Како што покажа претходната анализа на „360 степени“, земјава успеа да и го удри „чеканот“ на корона-кризата. Но, по успешниот пад на бројот на активни случаи, состојбата стагнира па и благо се влошува, што значи дека почнува и „танцот“ со ковид-19.