Пред месец и половина лидерот на владејачкиот СДСМ на својот „Фејсбук“-профил ја објасни стратегијата на „чекан и танц“ со коронавирусот. Во превод, станува збор за пристап кој подразбира остри рестриктивни мерки при појавата на ковид-19 се до неговото ставање под контрола, по што следува подолг период на постепено олабавување на мерките, но и нивно повторно воведување кога за тоа ќе се појави потреба.
Повторно растат активните случаи
Македонија утре ја навршува 12-тата недела од појавата на првиот ковид-19 случај во земјава, кој беше регистриран на 26 февруари. Анализата на „360 степени“ на бројот на активни случаи, што е разликата меѓу бројот на дијагностицирани пациенти минус оние кои оздравеле или починале, покажува дека врвот на заразата е постигнат на 19 април 2020 година кога имаше 977 активни случаи. По тој датум, бројот на активни случаи забележа драматичен пад до 394 активни случаи на 6 мај. На 7 ма, трендот беше прекинат со мал раст и оттогаш бројката се колеба околу 400 активни случаи. Иако минимално, во последниве четири дена има континуиран раст на активните случаи.
Со речникот кој го употребуваше и претседателот на СДСМ, Зоран Заев, се чини дека „чеканот“ го даде својот резултат со драматичниот пад на број на активни случаи. Иако е можеби рано да се тврди, но бројките покажуваат дека почнал и „танцот“, односно дека повторно се јавува благ раст на активните случаи.
Порасна и бројот на заразени од тестираните
При изборот на метод за тестирање за ковид-19, здравствените власти во земјава одлучија да спроведат т.н. целно (или таргетирано) тестирање. Тоа значи дека се тестираат само лица кои имаат симптоми на коронавирусот и лица кои биле во контакт со потврдените случаи.
Поради тоа, со падот на бројот на новозаразени, почна да се намалува и бројот на тестови, бидејќи имаше се помалку целни групи или т.н. „таргети“. Но, статистика која е особено важна не е само бројот на тестови, туку и колкав процент од тие тестови се позитивни.
Според податоците кои ги објавува Министерството за здравство, од почетокот до средината на април имаше три дена кога процент на позитивни од тестирани изнесуваше над 15%, а генерално бројката се движеше околу 10%. Од средината на април па до првите денови во мај се случи драматичен пад на процентот на позитивни тестови, што се совпаѓа со останатите статистики за смирување на епидемијата. Речиси 20 дена по ред просекот на позитивни тестови беше околу 5%, а се спушти до најниски 2%. Но, од 7 мај бројките повторно почнаа да „танцуваат“. Во само еден ден оттогаш има процент на заразени од тестирани понизок од 5%. Во сите останати просекот е повисок од претходните 20-ина дена, а имаше и случај на 15,2% позитивни во едно деноноќие.
Растот на нови случаи, а со тоа и бројот на активни слуачи, здравствените власти досега го објаснуваа како „ефект“ од првомајските празници. Како на бројките ќе влијае отворањето на трговските центри, ќе биде видливо по една до две недели.
Сепак, никој не очекуваше ковид-19 да биде комплетно искоренет. Прашањето е само дали со актуелните бројки може „понормално“ да се живее.