Со оглед на тоа што за да бидат избрани нови министри и заменици актуелните треба да поднесат оставки или да бидат разрешени од парламентот, „360 степени“ праша во Владата дали премиерот предложил разрешување на некој министер или заменик бидејќи немаше информација оти некој поднел оставка. Добивме одговор во кој, всушност, нема одговор на нашето прашање
Во меѓувреме, на веб-страницата на Собранието беа објавени предлозите од Ковачевски за разрешување на министрите и замениците од Алтернатива
Со доставувањето на предлогот до Собранието за реконструкција на Владата од страна на премиерот Димитар Ковачевски, кој предвидува промени на четири министерски и пет заменик-министерски позиции, се наметна прашањето дали премиерот до Собранието предложил и разрешувања на одредени министри или заменик-министри.
За да бидат избрани нови, актуелните министри и заменик-министри во Владата треба да си поднесат оставка од функцијата или да бидат разрешени од Собранието.
„360 степени“ го упати следното прашање до владината прес-служба:
„Дали премиерот до Собранието предложи и разрешување на некои министри и заменик-министри, бидејќи за да бидат избрани нови, досегашните или треба да ги разреши парламентот или треба да дадат оставка? Засега нема информација дека кој било дал оставка.”
Одговорот што го добивме и во кој, всушност, нема директен одговор на нашето прашање, го објавуваме интегрално:
„Во однос на вашите прашања, ви посочуваме дека претседателот на Владата, Димитар Ковачевски, предлогот за реконструкција на Владата ќе го образложи на собраниска седница.
Во моментов најважно за државата е што се окрупнува проевропскиот блок со тоа што се зголемува мнозинството кое е цврсто определено за продолжување на суштинските реформи важни за европскиот пат на Северна Македонија.
Владата продолжува со реализација на политиката која обезбедува стабилност и сигурност во услови на економска и енергетска криза предизвикана од глобални трендови.“
Во меѓувреме, на веб-страницата на Собранието беа објавени предлозите од Ковачевски за разрешување на министрите и замениците од Алтернатива.
Претходно денеска Социјалдемократскиот сојуз ѝ порача на Алтернатива оти е добредојдена со свој придонес во европската коалиција, а дека вратата за соработка за неа е отворена и понатаму.
„Упатуваме порака до Алтернатива дека вратата за соработка е отворена и понатаму. Овие времиња се важни за европската иднина и за економските реформи и ги повикуваме да се издигнат над теснопартиските интереси и да размислат уште еднаш. Иако Алтернатива не одговори на понудата за продолжување на соработката, партијата е добредојдена со свој придонес во европската коалиција“,
изјави портпаролот на СДСМ, Дарко Каевски, на денешната прес-конференција.
Откако премиерот Димитар Ковачевски и официјално го достави предлогот за реконструкција на Владата до Собранието, од прес-службата на парламентот попладнево потврдија дека предлогот е примен во нивната архива, со што тој влегува во собраниска процедура.
„Премиерот го достави предлогот за реконструкција на Владата и е примена од нашата архива. Кој ден ќе биде на седница, односно кога претседателот на Собранието ќе ја свика, ќе информираме дополнително“,
велат од собраниската прес-служба.
Според предлог-кадровските решенија, нови шефови ќе добијат четири владини ресори (министерствата за здравство, правда, информатичко општество и администрација и животна средина и просторно планирање). Во пет ресори, пак, предложени се нови заменик-министри.
Предложената реконструкција на Владата значи дека Алијанса за Албанците би добила три министерски и две заменик-министерски места, а Алтернатива би ги изгубила двата ресора што ги раководи во моментов. Алтернатива досега не се произнесе дали останува или ја напушта Владата на Димитар Ковачевски, а конечна одлука по ова прашање најави за утре.