„Иако Алтернатива не одговори на понудата за продолжување на соработката, партијата е добредојдена со свој придонес во европската коалиција“, порачаа од СДСМ откако премиерот Димитар Ковачевски и лидер на СДСМ официјално го достави до Собранието предлогот за реконструкција на Владата
Според предлог-кадровските решенија што Ковачевски ги достави до Собранието, Алтернатива би ги изгубила актуелните министерски позиции во два ресора – здравство и информатичко општество и администрација, а на нивно место би дошле кадри на Алијанса за Албанците (АА). Алтернатива досега не се произнесе дали останува или ја напушта Владата на Димитар Ковачевски, а конечна одлука по ова прашање најави за утре
Иако не одговори на понудата за продолжување на соработката, Алтернатива е добредојдена со свој придонес во европската коалиција, порачаа денеска од Социјалдемократскиот сојуз откако премиерот Димитар Ковачевски и лидер на СДСМ официјално го достави до Собранието предлогот за реконструкција на Владата.
Според предлог-кадровските решенија што Ковачевски ги достави до Собранието, Алтернатива би ги изгубила актуелните министерски позиции во два ресора – здравство и информатичко општество и администрација, а на нивно место би дошле кадри на Алијанса за Албанците (АА). Инаку, Алтернатива во актуелниот владин состав има и министер без ресор (задолжен за дијаспора), Џемаил Чупи, но засега од Владата нема информација дали е предложено негово разрешување.
Алтернатива досега не се произнесе дали останува или ја напушта Владата на Димитар Ковачевски, а конечна одлука по ова прашање најави за утре.
„Упатуваме порака до Алтернатива дека вратата за соработка е отворена и понатаму. Овие времиња се важни за европската иднина и за економските реформи и ги повикуваме да се издигнат над теснопартиските интереси и да размислат уште еднаш. Иако Алтернатива не одговори на понудата за продолжување на соработката, партијата е добредојдена со свој придонес во европската коалиција“,
изјави портпаролот на СДСМ, Дарко Каевски, на денешната прес-конференција.
Тој додаде дека Социјалдемократскиот сојуз не ги дели партиите, туку е отворен за идна соработка и со други пратеници од други партии кои, како што рече, сакаат да ги поддржат реформите, економските политики и агендата на ЕУ за подобра иднина на земјата.
„Исклучително е важно, во време кога сè уште трае енергетската и економска криза, да нема закони заглавени во Собранието, да се спречат блокадите на ВМРО-ДПМНЕ, но и да се отвори пат за нови закони за унапредување на животот на сите граѓани. Со вклучување на Алијанса за Албанците како нов коалициски партнер во Владата се обезбедуваат сите услови за политичка стабилност и зголемена ефикасност на Собранието и институциите“,
кажа Каевски и додаде дека поголемо парламентарно мнозинство ќе донесе стабилност и ефикасност за продолжување на реформите во економијата, во судството и во интеграцијата на земјата во ЕУ.
Зголеменото парламентарно мнозинство, според владејачкиот СДСМ, ќе овозможи унапредување на владеењето на правото и борбата против корупцијата, енергетската транзиција, економските иницијативи како Отворен Балкан, а поголема поддршка, кака што додаваат оттаму, добива и планот за стратегиско партнерство со САД и унапредување на добрососедските односи.