Комисијата за заразни болести утре изутрина ќе се состане за да ја разгледа можноста за воведување дневен престој во училиштата, а одлуката ќе зависи од епидемиолошката слика.
„Последната информација што ја имавме во Комисијата е дека нема да има целодневен престој. Утре наутро имаме состанок, ќе ги видиме ставовите на Министерството за здравство, на министерот за здравство, на членовите на Комисијата“,
изјави денеска директорот на Здравствен дом Скопје, Виктор Исјановски, кој е член на Комисијата за заразни болести.
Одлуката, посочи Исјановски, ќе зависи од епидемиолошката слика, од сите случувања во однос на самата болест и од условите и критериумите, кои треба да се исполнат за воведување целодневен престој.
Министерот за здравство Венко Филипче, пак, вчера излезе со оптимистичка очекувања велејќи дека смета оти ќе се донесе позитивна одлука. Тој рече дека веќе е направена анализа за бројката на деца коишто би требало да останат во училиште и по завршувањето на часовите во смена.
„Ќе се донесе позитивна одлука исто како што се носи одлука и за исклучоците во сите други училишта, односно ако бројката на децата е толку мал да никако не ја загрозува нивната безбедност, односно да нема дополнителен епидемиолошки ризик што одредена група на деца ќе остане и после завршувањето на смената. Предност што е тоа истата група на деца, значи не се зголемуваат контактите, тие биле во контакт претходно, сега само се зголемува времето на престојот“,
појасни Филипче.
Можни се нови мерки или повторно затворање на градинките
Докторот Исјановски денеска ја коментираше и можност за затворање на градинките, доколку дојде до влошување на состојбата со ковид-19.
„Да, можно е повторно затворање на градинките, можно и да се преземат одредени мерки и да се дадат насоки од Комисијата кон Владата“,
рече Исјановски, одговарајќи на новинарско прашање.
Градинките почнаа со работа на 9 септември, но веќе има неколку случаи на дечиња заболени од коронавирусот. Прв случај беше забележан на 15 септември во градинката „13 Ноември“ во Општина Центар во Скопје.
Во Струмица, пак, досега се дијагностицирани три деца од иста група позитивни на ковид-19.