Ниту се продавам за ситни пари ниту сум мафијаш, јас сум професионалец и сите во Комисијата за заштита од заразни болести сме професионалци, таму членувам од 1994 година, рече денеска д-р Жарко Караџовски како одговор на обвинувањата на опозициската ВМРО-ДПМНЕ, која преку неколку соопштенија бара оставки од членовите на Комисијата.
„Јас и мојата фамилија ниту некогаш сме биле, ниту ќе бидеме мафијаши, ниту ќе бидеме корумпирани, а особено не се продаваме за ситни пари. Ако некој од нас бара оставка, треба да аргументира зошто ја бара“,
рече Караџовски.
Тој на денешната прес-конференција посочи дека во Комисијата има професионалци со 30-годишно искуство, таму има луѓе кои имаат свои семејства и не е во ред некој за нив да вели дека се мафијаши или корумпирани.
„Јас сум член на Комисијата за заразни болести во континуитет 26 години. Во состојба кога која било партија била на власт, внатре биле исклучиво професионалци од областа. Дури и кога била друга политичка партија на власт, јас сум бил таму, затоа што сум професионалец. Бевме обвинувани дека земаме големи пари, дури дека се продаваме за ситни пари и дека сме мафијаши“,
рече Караџовски.
Тој додаде дека не се точни обвинувањата дека имал хациенди, туку рече дека живее во двособен стан и рече дека ако некој бара оставка од него, тоа треба да биде аргументирано.
„Имам автомобил стар 18 години, имам двособен стан, а не хациенда како што се пишуваше. Нека ми каже некој преку која истражна комисија, дали полиција, финансиска полиција, завршна сметка или кој било потпис, министерот ми има потпишано екстра пари мене или на Комисијата. Нека дојде меѓународна комисија да го провери тоа. Ние од Комисијата сме чисти како солза. Сме направиле 132 состаноци, имаме аргументација од 50 страници“,
додаде Караџовски.