Министерот за внатрешни работи во вечерашното гостување на централниот Дневник на телевизија Сител рече дека безбедносните камери долж граничните премини и патните правци не ја регистрирале ниту неа, ниту нејзиниот адвокат во критичниот временски период — од моментот кога последен пат била забележана како се забавува во локал во Кочани, па сè до нејзиното појавување во бугарските медиуми
Надоврзувајќи се во одговорот, министерот рече дека пропагандата што се шири, веројатно мислејќи на онаа што доаѓа од Бугарија, не може да ја засени суштинската теза — дека една земја членка на Европската Унија, наш сосед, со текот на годините станува заштитник на осомничени и осудени криминалци
Еден месец по бегството на Ива Михаилова и понатаму трае истрагата како таа ја напуштила земјава и влегла во Бугарија. Министерот за внатрешни работи Панче Тошковски вели дека она што може да го каже во оваа фаза од истрагата е дека нејзините тврдења, како и изјавите на нејзиниот адвокат за начинот на кој ја напуштила државата се целосна невистина.
Според досегашните наоди од истрагата што ги соопшти Тошковски во вечерашното гостување во „Тема на денот“ во централниот Дневник на телевизија Сител, Михаилова воопшто не е евидентирана во македонските системи за влез и излез од земјата во текот на 2026 година. Првичните информации добиени од бугарската гранична полиција, исто така, потврдуваат дека таа нема официјален влез на територијата на Бугарија во текот на оваа година.
Михаилова пред бегството се забавувала во локал во Кочани
Дополнително, вели ресорниот министер, безбедносните камери долж граничните премини и патните правци не ја регистрирале ниту неа, ниту нејзиниот адвокат во критичниот временски период — од моментот кога последен пат била забележана како се забавува во локал во Кочани, па сè до нејзиното појавување во бугарските медиуми.
„Во тој критичен временски интервал ги нема евидентирано ниту една камера, а камоли полициските службеници да ја отпоздравуваат, да ја величаат или да кажуваат колку е таа значајна“,
рече Тошковски.
Надоврзувајќи се во одговорот, министерот рече дека пропагандата што се шири, веројатно мислејќи на онаа што доаѓа од Бугарија, не може да ја засени суштинската теза — дека една земја членка на Европската Унија, наш сосед, со текот на годините станува заштитник на осомничени и осудени криминалци.
На новинарската констатација дека овие околности упатуваат на организирана операција за нејзино изнесување од државата и прашањето дали е утврдена одговорност кај полициски службеници, министерот оцени дека засега нема индиции за полициска вина.
Тој, во овој контекст, наведе дека Михаилова уредно ги почитувала мерките на претпазливост и редовно се пријавувала во полициската станица во Кочани согласно судските термини сè до моментот на бегството. Бидејќи границата кон Бугарија ја поминала нелегално, надвор од официјалните гранични премини каде што има полициска контрола, Тошковски смета дека не може да се лоцира одговорност ниту кај граничните службеници, ниту кај полицајците во Кочани.
Контекст
Ива Михаилова од Кочани, која поседува македонско и бугарско државјанство, пред кочанскиот суд е обвинета за тешки дела против безбедноста на луѓето и имотот во сообраќајот — односно за сообраќајна несреќа со смртни последици. Уште во октомври минатата година, судот ѝ определил мерки на претпазливост, при што ѝ биле одземени двата пасоша (македонскиот и бугарскиот), и ѝ била изречена забрана за напуштање на земјата и обврска за редовно јавување во суд, поради што таа била ставена и на стоп-листата на МВР.
Таа избега во Бугарија во октомври 2026 година, по што на 12 октомври се појави пред медиумите во Софија заедно со својот бугарски адвокат Николај Димитров, тврдејќи дека заминала поради влошена здравствена состојба и чувство на небезбедност. И таа и нејзиниот адвокат тврдеа дека од земјава излегле и влегле во Бугарија преку граничен премин, но не кажаа на кој.
На крајот на минатата и почетокот на оваа недела Михаилова се појави во поткаст и на Бугарската национална телевизија (БНТ) и во интервјуата изнесе низа обвинувања против македонското правосудство и власта. Во гостувањата таа ниту беше прашана, ниту самата кажа како ја преминала македонско-бугарската граница.
По нејзиното бегство, Основното јавно обвинителство Кочани побара притвор и по неа беше распишана централна и меѓународна потерница, а кочанскиот суд одлучи да ѝ се суди во отсуство. Таа во разговорот за БНТ соопшти дека преку своите адвокати побарала да учествува во судскиот процес во кочанскиот суд преку видеоконференциска врска, но на рочиштето во понеделникот (9 ноември) барањето беше одбиено од судот.