Клековски рече дека сите случаи се обработуваат темелно епидемиолошки за да се утврдат контактите и да се предупредат сите можни контакти
Дете на возраст над една година е сомнителен случај на морбили во државава, изјави денеска министерот за здравство Сашо Клековски.
Тој вели дека сè уште се вршат лабораториски испитувања. Досега има пет потврдени случаи со морбили во државава, од кои четири се македонски државјани, а еден е странец.
Клековски рече дека сите случаи се обработуваат темелно епидемиолошки за да се утврдат контактите и да се предупредат сите можни контакти.
„Знам дека имаме зголемено ниво на вакцинирање. Имаме доволно вакцини на залиха, така што мислам дека на почетокот имавме околу 15 000, а има и други достапни количини“,
рече Клековски одговарајќи на новинарско прашање по посетата на Стоматолошкиот клинички центар.
Тој демантираше дека Министерството за здравство или која било здравствена институција испратиле насоки до Министерството за образование или до Министерството за социјална политика да бараат потврди за вакцинирање.
„Ниеден дел од здравствените власти нема испратено препорака до соодветните други установи, зборуваме за образование за непримање на деца. Нашето апелирање е до родителите дека со невакцинирањето ги изложуваат сопствените деца, бебињата на ризик. Чинот на доброволност го нагласувам за да се избегнат моментите на постојните групи на антиваксери кои сметаат дека ова е повторно некаков заговор за да ги тераме родителите да ги вакцинираат децата. Нема никаков заговор“,
додаде Клековски.
Тој упати апел до сите родители укажувајќи дека нема подобра заштита за сипаници од вакцинација.
„Сите заедно како општество треба да се вклучиме со јасна волја дека ова е единствен начин да спречиме епидемија и дека сите треба да направиме чекор кон тоа. Нема потреба да се закануваме, да присилуваме, да се фалсификуваат потврди и што уште не да се прави“,
додаде Клековски.