„Подоцна тоа што се случило е случај што треба да го разгледуваат други државни институции“, вели директорот на Царинската управа
Товарното моторно возило со косовски регистарски таблички, кое ја предизвика тешката сообраќајна несреќа на скопската обиколница во која животот го загубија четири лица, влегло во земјава преку граничниот премин „Блаце“. Возилото било празно, а во царинската постапка не биле констатирани никакви нерегуларности.
Ова вечерва го соопшти директорот на Царинската управа, Бобан Николовски, за време на своето гостување во емисијата „Топ тема“ на ТВ Телма.
„Сето она што е поврзано како царинска постапка за товарното моторно возило и возачот ги исполнувал сите услови кои се потребни во царинска постапка за да помине на тој граничен премин“,
изјави Николовски.
Тој вели дека од аспект на царинските контроли сè било во рамките на законот, а причините и околностите што доведоа до страшната трагедија се предмет на натамошна истрага на другите надлежни органи.
„Подоцна тоа што се случило е случај што треба да го разгледуваат други државни институции“,
додаде директорот на Царината.
Сообраќајната несреќа, која ја вознемири јавноста, се случи во четвртокот вечерта околу 23 часот на скопската обиколница во делот помеѓу надвозникот кај Визбегово и клучката Мирковци.
Во несреќата загинаа три момчиња на 20 години и баритонот и првенец на Националната опера и балет (НОБ), Ристе Велков.
На возачот на камионот, 76-годишниот Б.Б., кој е косовски државјанин, определен му е 30-дневен притвор поради опасност од бегство и можност за повторување на кривичното дело.
Поврзани вести:
- Определен 30-дневен притвор за возачот на камион што усмрти четворица во сообраќајка на скопската обиколница
- ОЈО Скопје отвори истрага и бара притвор за косовскиот државјанин по сообраќајката на скопската обиколница
- Дваесетгодишен скопјанец е четвртата жртва во сообраќајката на скопската обиколница
- Баритонот Ристе Велков и неговиот син се меѓу загинатите во сообраќајната несреќа на скопската обиколница
- Четворица загинати во сообраќајката на скопската обиколница, возачот на камионот е приведен – МВР со детали за несреќата
- Сообраќајна несреќа на скопската обиколница – автомобил се запалил по директен судир со камион