Талибанските борци го освоија првиот главен град во една од авганистанските провинции на 6 август, а до 15 август тие веќе беа пред портите на Кабул, главниот град на државата
За само десет дена, Талибанците го освоија речиси цел Авганистан и ја презедоа контролата врз бројните провинциски престолнини низ целата земја. Се чини дека авганистанската војска не пружила силен отпор, а на некои места воопшто нема отпор, бидејќи некои градови „паднале“ без борба.
Талибанските борци го освоија првиот главен град во една од авганистанските провинции на 6 август, а до 15 август тие веќе беа пред портите на Кабул, главниот град на државата.
Нивниот молскавичен напредок принуди десетици илјади цивили да ги напуштат своите домови и да избегаат. Многумина од нив отидоа во главниот град Кабул, а други во соседните земји. Наскоро настана целосен хаос во Кабул, дури и авганистанскиот претседател Ашраф Гани ја напушти земјата, а илјадници негови сонародници се обидоа да го сторат истото.
Охрабрени од повлекувањето на американските и другите меѓународни сили, талибанците успеаја да стават под нивна контрола голем дел од Авганистан уште во јуни. По 6 август, нивниот напредок се забрза. Провинциските градови „паѓаа“ еден по друг, и до 8 август веќе ја презедоа контролата врз Кундуз. Херат, Кандахар и Лашкаргах исто така „паднаа“ за неколку дена.
Авганистанската војска се распаѓа
И покрај 20-годишната поддршка од странските сили, милијарди долари во финансирање, обемната програма за обука и американската воздушна поддршка, авганистанските сили не беа во можност да одговорат на талибанските напади. Кога странските војници се повлекоа, Авганистанците буквално беа оставени сами на себе.
Во Лашкаргах, авганистанските војници беа на клучните позиции, додека талибанците нападнаа во неколку наврати. Стотици командоси беа испратени да воспостават ред, но кога талибанците активираа масивна автомобил-бомба пред полицискиот штаб на 11 август, битката во голема мерка заврши.
Во многу области, авганистанските единици останаа без муниција и друга опрема. Војниците вооружени и обучени од Соединетите држави го оставија населението да се грижи за себе.
На некои места, локалните власти им дозволија на Талибанците да ја преземат контролата само за да избегнат крвопролевање. Во Газни, на полицискиот началник и гувернер им беше дозволено да го напуштат градот во замена да се согласат за преземање на талибанците. Мазар-и-Шариф падна на 14 август со мал отпор од авганистанските војници, од кои некои го напуштија градот и се упатија кон границата со Узбекистан кај Хараитан.
Хаос во Кабул
До 15 август, 17 600 луѓе бегајќи од талибанците пристигнаа во Кабул, а илјадници пристигннуваа цело време за време на конфликтот, соопшти Канцеларијата на ОН за координација на хуманитарни прашања.
Со многу мала поддршка од авганистанските власти, многумина спиеја во паркови и јавни површини. Некои рекоа дека доаѓаат од поробени градови каде талибанците ги убивале машки членови на семејството кои работеле за безбедносните сили, и повторно вовеле бројни ограничувања за жените.
Кога претседателот Гани избега од земјата, вработените во Американската амбасада беа евакуирани со хеликоптер од нивниот силно обезбеден комплекс. Илјадници луѓе се упатија кон аеродромот во Кабул во тој момент, во обид да ја напуштат земјата. Драматични сцени беа снимени и на аеродромот – луѓето се туркаа и скокаа еден над друг за да се качат на авионот за евакуација. Исто така, снимено е како тие ги фаќаат крилјата и тркалата на авионот што веќе се движи по пистата. Во еден момент, американските војници мораа да пукаат во воздух за да го смират хаосот.
Неизвесна иднина
Не е јасно како талибанците имаат намера да владеат, но можно е ситуацијата да варира од провинција до провинција. Извештаите од териториите што сега се под контрола на талибанците даваат различна слика.
Во Балх, кој се наоѓа на 20 километри од Мазар-Шариф, на жените и девојките им е дозволено да одат на јавни места без придружба, но исто така има извештаи дека една жена е убиена поради начинот на кој се облекувала. На друго место, како што е северниот округ на земјата во близина на границата со Таџикистан, жените велат дека се принудени да се покријат со бурка и не можат да излезат на улица без придружба.
Некои медиуми, исто така, објавија дека жените биле принудени да се венчаат со талибански борци, но претставниците на Талибан во Кабул инсистираат дека ова е „лага“.