Убедливо најнискиот одѕив во шестата ИЕ, која беше прекроена непосредно пред распишувањето на вонредните избори не се одрази на салдото на партиите на етничките Албанци во земјава
Кај Левица, веројатно, се одлеале дел од гласовите што ги изгубија СДСМ и ВМРО-ДПМНЕ. Друг дел гласови веројатно отишол кај другите, главно, нови партии што учествуваа на овие избори, ама не обезбедија влез во законодавниот дом
Коалициите на СДСМ и на ВМРО-ДПМНЕ влегуваат во новиот состав на парламентот со иста разлика во мандати како и по изборите во 2016 година, но во „обратна насока“ и овој пат со помал број пратеници. За разлика од пред четири години, кога ВМРО-ДПМНЕ освои 51 мандат или два повеќе од СДСМ (49), сега коалицијата „Можеме“ во која влезе и Беса има 46 пратенички мандати или два повеќе од ривалската „Обнова“ (44).
Но, освен што изгубија мандати во споредба со 2016 година (коалицијата на СДСМ 3, а коалицијата на ВМРО-ДПМНЕ – 7), двете најголеми партии изгубија и по повеќе од 100 илјади гласа, согласно со значително понискиот одѕив на овие избори, кога на гласање излегоа 942 334 граѓани, наспроти близу 1,2 милиони во 2016 година.
Затоа, пак, двете водечки партии во албанскиот камп ДУИ и Алијансата за Албанците добија уште неколку десетици илјади гласови и мандати плус. Алијансата сега има 12 пратенички места или девет повеќе отколку во 2016, додека кај ДУИ зголемувањето е за 5 мандати, така што во новиот состав на закодавниот дом ќе има 15 пратеници.
Убедливо најнискиот одѕив во шестата ИЕ, која беше прекроена непосредно пред распишувањето на вонредните избори, очигледно не се одрази на салдото на партиите на етничките Албанци во земјава. Единствено ДПА сега изгуби речиси половина од гласовите во 2016 година, поради што доби и еден мандат помалку, од вкупно два што ги имаше во досегашниот состав на парламентот.
За Беса, која во 2016 година првпат учествуваше на избори, е потешко да се направи споредба, со оглед на тоа што партијата, која тогаш освои 5 мандати, во меѓувреме се подели на два политички субјекти кои настапуваа на овие избори во два различни табори.
Билал Касами, кој го задржа името Беса, одеше во коалиција со СДСМ, а Африм Гаши од Алтернатива настапи заедно со Алијансата. Во секој случај, вкупната бројка на пратеници што ќе ја имаат Беса и Алтернатива во новиот парламент е поголема од нивните заеднички пет мандати освоени во 2016 година. Според портпаролот на ДУИ Бујар Османи, Беса моментно има четири освоени пратенички места во коалицијата со СДСМ, а исто толку има и Алтернатива во коалицијата со Алијансата на Зијадин Села.
Значително подобреното салдо во гласови за Левица, во споредба со 2016 година, ѝ донесе два пратенички мандати на оваа партија во новиот парлсамент. Кај Левица, веројатно, се одлеале дел од гласовите што ги изгубија СДСМ и ВМРО-ДПМНЕ. Друг дел гласови веројатно отишол кај другите, главно, нови партии што учествуваа на овие избори, ама не обезбедија влез во законодавниот дом.
Меѓу нив е Интегра, која освои вкупно 12 291 глас во шестте изборни, ама тој скор не ѝ донесе ниту еден мандат на оваа нова партија. Останатите партии кои учествуваа на изборите се со далеку помал број гласови.