За споредба, на овие избори највисок е одѕивот во 4 ИЕ – 53,3 отсто. Таму на гласање излегле 150 582 избирачи или 39 759 отколку во „шестката“
Ниту до 36 проценти не стигна одѕивот до 19 часот на 10. парламентарни избори во шестата изборна единица, чиј центар е во Тетово.
До 19 часот, кога во „обичен“ изборен ден се затвораат гласачките кутии, а сега гласањето е продолжено за уште два часа, одѕивот во шестата ИЕ бил 35,7 отсто. Изборниот регион, кој веќе традиционално има најниска излезеност на изборите во земјава и сега е на дното во споредба со другите пет ИЕ, додека излезеноста на ниво на државата стигна до 45,7 отсто.
На овие избори евидентно е дека на гласање и во „шестката“ излегоа уште помалку избирачи во споредба со последните парламентарни избори – во декември 2016 година. И тогаш, наспроти високиот одѕив на национално ниво, кој стигна и до 70 проценти, во 6 ИЕ имаше излезеност од „само“ 51,3 отсто – процент што годинава се покажа недостижен.
Во 2016 година, во оваа ИЕ на гласање излегле 157.960 избирачи, додека годинава бројката до 19 часот е 110.823 или 47.137 разлика. Секако останува можноста одѕивот да се зголеми за некој процент, со оглед на тоа што на годинашниве избори гласањето трае до 21, наместо до 19 часот, поради ситуацијата со коронавирусот и мерките на заштита.
Исто така, треба да се има предвид дека, непосредно пред распуштањето на парламентот во февруари годинава, 6 ИЕ беше „прекроена“, односно избирачките места од општина Дебар беа префрлени во петтата ИЕ.
До 19 часот, во Општина Дебар, која сега е во составот на 5 ИЕ, е регистриран одѕив од 37,2 проценти. Наспроти тоа, во 6 ИЕ највисок е одѕивот во Тетово – околу 40 отсто, а најнизок во општина Желино – околу 28 проценти.
За споредба, на овие избори највисок е одѕивот во 4 ИЕ – 53,3 отсто. Таму на гласање излегле 150 582 избирачи или 39.759 отколку во 6 ИЕ.