Владејачката партија ги закажа за 12 декември вонредните избори за лидер, на кои право на глас ќе имаат сите членови на СДСМ кои ќе се регистрираат како гласачи
Фросина Ременски, Димитар Ковачевски, Властимир Алексовски и Јован Деспотовски се четворицата кандидати кои го меркаат лидерското место на Зоран Заев во СДСМ.
Рокот на пријавување заврши попладнево во 16 часот, а од партијата за „360 степени“ потврдија дека дотогаш не се пријавиле нови кандидати, освен четворица за кои поединечно информираа изминативе денови.
Според најавите, утре Централната изборна комисија на СДСМ ќе ги анализира и ќе ги верификува оние кандидатури кои ги исполнуваат критериумите.
Раководството на партијата минатиот петок и официјално донесе одлука да се распишат вонредни избори за претседател, откако Заев ја најави неговата оставка уште изборната ноќ на 31 октомври, кога се одржа вториот круг од локалните избори. Тогаш Заев најави повлекување и од премиерската позиција.
Непосредните избори за лидер ќе се одржат на 12 декември.
Што нудат кандидати
Поранешната потпретседателка на СДСМ и експратеничка, Фросина Ременски, прва ја поднесе кандидатурата по распишаниот партиски конкурс и рече дека тоа го прави имајќи го предвид нејзиниот досегашен општествено-политички и партиски активизам во денови кога СДСМ бил соочен со тешка опозициска состојба, но и кога носел државнички одлуки.
На партијата, според нејзината изјава, ѝ е потребно обединување и консолидација на редовите.
„Ја очекувам поддршката од социјалдемократите, моите колешки во рамки на партијата и секако од сите членови кои го знаат мојот карактер, мојата конзистентност во ставовите и сето она што е даден придонес во една заедничка борба и соработка во изминатите години. Очекувам овој период СДСМ да го искористи за вистинско обединување на членството, за консолидација на партиските редови, за намалување на разликите помеѓу одредени структури во рамките на партијата затоа што многу е важно каква визија ќе промовираме. Мојата визија за СДСМ за следните пет години е победник во сите процеси пред кои е исправен и само така со таква визија и стратегија може да се постигне максимум во она што значи партиско организирање. А, со оглед дека е владејачка партија, да направи сè што не направила во изминатиот период и се рефлектирало на некакви резултати на локални избори“,
изјави Ременски пред два дена кога ја поднесе кандидатурата.
Враќање на единството во партијата, според изјавата, ќе биде едно од основните заложби и на актуелниот заменик-министер за финансии, Димитар Ковачевски, кој и пред поднесувањето на кадидатурата се споменуваше во јавноста како фаворит за наследник на Заев не само на лидерската, туку и на премиерската функција. Тој се кандидираше со програма „Заедно, одговорно и посветено“ и при поднесувањето порака дека партијата минува низ предизвик во кој мора да се промени и во кој секој член треба да биде слушнат.
„Програмата се базира на три основни столба, а тоа се: социјалдемократска визија – јасни социјалдемократски вредности од кои извираат принципите, вредностите на работењето и резултатите од него; економски раст односно посветеност кон економските политики и зголемување на животниот стандард на граѓаните; трето е фер шанса и јасен и правичен систем со одговорности во кој најдобрите ја добиваат одговорноста и шансата за унапредување на системот и исполнување на сите проекти кои се ветени пред граѓаните“,
рече Ковачевски кој кандидатурата ја поднесе истиот ден со Ременски.
Непознат за пошироката јавноста како што се останатите противкандидати е Властимир Алексовски, кој е третиот што се пријави за лидерската позиција во СДСМ. Алексовски, како што соопштија од партијата, е член и активист на СДСМ од Општинската организација на партијата во Куманово.
Денеска, на последниот ден од конкурсот, кандидатура поднесе и Јован Деспотовски кој е актуелен директор на Дирекцијата на ТИРЗ, а претходно беше прв човек на Фондот за иновации и технолошки развој.
Тој се кандидираше со програмата „Концепт 28“ во чиј фокус, според него, се луѓето. Целта на неговата програма, како што соопштија од партијата, е да се обезбеди повисок квалитет за живот на граѓаните преку поинаков пристап на креирање и спроведување на политиките и мерките.
„Нудиме концепт во политиката што нема да поаѓа од ’Кој‘, туку од ’Како‘ и ’Каков човек/луѓе‘ ни се потребни. Концепт што, преку конкретни и мерливи резултати, ќе ја зацврсти СДСМ како водечка политичка организација во Северна Македонија и по следните парламентарни избори. Концепт што ќе обезбеди континуитет и квалитет во спроведување на современите вредности и прогресивните политики до 2028 година“,
пишува во програмата на Деспотовски.
Социјалдемократите ќе добијат нов лидер откако на челната позиција Заев за првпат беше избран во 2013 година. Изборот на лидер на непосредни избори членството ќе го прави по втор пат од постоењето на партијата. Ваквите избори беа воведени по последните статутарни промени, а првпат се одржаа во март годинава кога Заев како единствен кандидат беше реизбран за претседател.