Рокот за поднесување кандидатури за иден претседател на СДСМ истекува денеска во 16 часот
Директорот на ТИРЗ, Јован Деспотовски, е четвртиот кандидат за иден лидер на СДСМ. Откако вчера најави дека сериозно размислува да се кандидира, Деспотовски денеска ја официјализира кандидатурата.
„Член сум на партијата 25 години и сум поминал различни нивоа од почетното најниско до член на највисоките раководни структури на партијата. Сметам дека имам реални резултати во мојот професионален ангажман, така што сметам дека можам да понудам и нов концепт околу кој ќе се обединат не само партијата, туку и општеството. Одлуката не е лесна. Предизвикот е голем, времето е многу комплицирано и одговорноста е голема“,
изјави Деспотовски вчера пред новинарите токму на ова прашање.
Деспотовски досега бил на серија раководни позиции во партијата, а во моментов е прв човек на индустриските зони. По професија е економист со познавања во делот на работата со европските пристапни фондови.
Рокот за поднесување кандидатури за иден претседател на СДСМ истекува денеска во 16 часот. Деспотовски е најновиот кандидат, а покрај него за лидерската позиција досега во трка уште се и Фросина Ременски, Димитар Ковачевски и Властимир Алексовски, кои веќе се самокандидираа.
До истекот на рокот како уште еден кандидат се шпекулира дека би можел да се пријави и Миле Зечевиќ, но засега нема официјална потврда за тоа.
Внатрепартиските избори за нов лидер на партијата по оставката на Заев од претседателската функција на СДСМ се распишани и ќе се одржат на 12 декември.