СДСМ денеска се очекува да ја поднесе иницијативата за свикување седница на Собранието до претседателот Талат Џафери.
Изминатите денови се собираа потписи, а според најавите од партијата, предавањето треба да биде денеска.
„Ставот на нашата пратеничка група е дека Собранието во една таква ситуација треба да биде ставено во функција. Секако, сметаме дека за тоа сме во согласност со Уставот на државата, и затоа од таа причина сметаме дека треба да направиме уште еден обид во тој дел. Добро е да се свика Собранието имајќи го предвид времетраењето на оваа здравствена криза, но секако и потврдувањето на одлуките на претседателот на државата“,
рече портпаролот и пратеник од СДСМ, Костадин Костадинов.
„360 степени“ пред два дена објави дека пратениците на СДСМ собираат потписи, а во текот на вчерашниот ден со ставови излегоа и дел од останатите партии. ДПА ја поддржува иницијативата, ДУИ вели дека мора да има консензус, а ВМРО-ДПМНЕ, според одговорот на партискиот потпретседател Владо Мисајловски, е против.