Демократската партија на Албанците (ДПА) сметаат дека треба да се свика Собранието и ќе ја поддржат таквата иницијатива, порача претседателот на партијата Мендух Тачи.
Тој рече дека е потребна контрола од Собранието за да не се газат човековите права и токму затоа во Уставот е предвидено вонредна ситуација од 30 дена, а не шест месеци или две години. По завршувањето на тие 30 дена, затоа е предвидена потврда и контрола и од парламентот.
„Ние сме парламентарна демократија. Собранието ја контролира извршната власт. Ако во одредени моменти, како што сега се наоѓаме, имаме вонредна ситуација, постои огромна опасност Владата да дејствува без парламентарна контрола. Веќе неколку пати посочуваме оти така веќе работи ДУИ која има очигледно за малку еден отсто апсолутна власт кај Албанците. Мислиме дека на првата седница на Собранието ќе треба да се дискутира за влада на национално единство во која ќе учествуваат сите парламентарни партии. Постои време за битки, постои време и за мир. Ова е време за мир и за соединување. Ќе дојде време кога ќе има можност за битки, политички, и тоа е во ред и тоа е демократија“,
истакна Тачи на денешната прес конференција.
Тој рече дека се согласуваат Беса и Алијанса за Албанците да бидат во таа влада затоа што тие се парламентарни партии. Добро, е рече Тачи, што кај Македонците сите релевантни парламентарни партии се во владата преку коалициите околу СДСМ и ВМРО-ДПМНЕ, но така треба да биде и кај Албанците.
„360 степени“ вчера пишуваше дека пратеници на СДСМ собираат потписи за да го одоброволат претседателот на Собранието Талат Џафери да го свика распуштениот парламент.
Треба да се соберат најмалку 20 потписи, но, како што се посочува, тоа не е гаранција дека Џафери ќе свика седница. Тој во неколку наврати во овој период посочи дека распуштениот парламент нема мандат да се состане повторно и да носи одлуки.