Продолжува преписката меѓу раководството на партијата и Иницијативниот одбор за вонреден конгрес
Обидот на сѐ уште актуелниот претседател на ВМРО-ДПМНЕ Христијан Мицкоски да го избегне соочувањето со делегатите што го избраа на 16-от конгрес преку закажување редовен конгрес во ноември е поигрување со партијата и со сите членови што ги овластија делегатите во Валандово да му го доверат водството, реагираат од Иницијативниот одбор за свикување вонреден конгрес на ВМРО-ДПМНЕ, кои вчера закажаа одржување конгрес на 28 март во Скопје со главни точки – отчет за сработеното на Мицкоски и гласање доверба.
„Христијан Мицкоски нема капацитет и не ужива доверба меѓу членовите на партијата, а уште помалку меѓу неутралните граѓани. Христијан Мицкоски ќе му донесе уште еден пораз на ВМРО-ДПМНЕ на претстојните локални избори, исто како што му донесе порази и на претседателските и на парламентарните избори. Мицкоски успеа да го изгуби и второто место по популарност паѓајќи на трето зад лидерот на Левица, Димитар Апасиев“,
се вели во реакцијата на оваа група членови на опозициската партија на вчерашната одлука на Централниот комитет од синоќа, редовниот и изборен конгрес на партијата да се одржи во ноември.
Од Иницијативниот одбор сметаат дека политичар со толкав негативен рејтинг не може да очекува победа, а партијата, како што велат, не може веќе да си дозволи таков луксуз да биде водена од човек кој ја влече надолу и стимулира нови поделби и расправии.
„На ВМРО-ДПМНЕ ѝ треба сплотеност и решителност во реализација на стратешките цели. На ВМРО-ДПМНЕ ѝ треба вонредниот 17. конгрес на кој ќе се преиспитаат политиките водени од Мицкоски овие три години и ќе се зацртаат насоките во кои партијата ќе се врати на победничките патеки. На ВМРО-ДПМНЕ ѝ треба итна промена за да се влезе со нова енергија на локалните избори“,
се вели во реакцијата.
Настапите од нивните сопартијци велат дека се под диктат на Мицкоски чија цел е да се омаловажат делегатите што го избрале.
„Навредите дека делегатите што го избрале се отпадници, покажуваат дека Мицкоски нема никаков респект кон сопартијците кои му верувале и дека е подготвен на најдолна реторика и највалкани игри само за да ја сочува функцијата. Мицкоски не беше избран на приватна забава и делегатите од конгресот кој го избраа не организираат приватна забава на 28 март, туку состанок на кој ќе се расправа и одлучува за најважните прашања кои ја засегаат партијата и државата“,
посочуваат од Иницијативата и истакнуваат дека Мицкоски ја претворил партијата во приватна сопственост.
Иницијативниот одбор на крајот ги повикува и оние делегати што се сѐ уште се премислуваат да се приклучат во организацијата на вонредна седница на конгресот.