Додека претседателот Пендаровски вели дека е голем потегот на Србија да ни даде жито, министерот за земјоделство нагласува дека во домашните млинови има резерви од 45 000 тони пченица, што, според него, е сосема доволно за потребите на домашниот пазар до следната реколта
Наспроти тврдењата на властите дека има доволно стокови резерви, опозициската ВМРО-ДПМНЕ обвинува за неодговорност
Во државата има сосема доволна количина пченица и пченка, тврди министерот за земјоделство Љупчо Николовски, откако српскиот претседател Александар Вучиќ најави синоќа дека Србија, на барање на Северна Македонија, ќе испорача 50 000 тони пченица и 25 000 тони пченка.
Претседателот Стево Пендаровски синоќа рече дека е голем потегот на Србија да ни даде пченка и пченица, додека министерот за земјоделство нагласува дека во домашните млинови има резерви од 45 000 тони пченица, што, според него, е сосема доволно за потребите на домашниот пазар до следната реколта.
Денеска се огласи и опозициската ВМРО-ДПМНЕ прашувајќи „дали Владата, иако знаела за ризикот, сепак ја остави државата без стокови резерви на пченица“, додека министерот Николовски вели дека споменатите количини се во годишните планови на стопанските субјекти, а не за стоковите резерви.
„Министерствата за земјоделство на Северна Македонија и Србија имаат континуирана комуникација за сите земјоделски производи што се извезуваат и увезуваат од двете страни, вклучително и за пченица и пченка. Споменатите количини се во годишните планови на стопанските субјекти, кои им се планирани да ги увезат до почеток на жетва, со цел како и секоја година да бидат покриени потребите на домашниот пазар и работата на млиновите, пекарите и други субјекти, не за потребите на државата или стоковите резерви“,
напиша Никловски на Фејсбук.
Српскиот претседател, во синоќешното вонредно обраќање до јавноста за политичката и економската криза околу воениот конфликт во Украина, изјави дека С Македонија побарала 50 000 тони пченица и 25 000 тони пченка и дека Србија може веднаш тоа да го испорача.
„Немаме проблем во врска со тоа. Тие купуваат пченка од нас и секогаш ќе имаме и за регионот, и за нас, и за Северна Македонија, и за Црна Гора, и за Албанија, и за БиХ“,
изјави Вучиќ, како што пренесе МИА од Белград.
Тој рече дека Украина и Русија се вкупни извозници на пченка од 29 отсто на светската производство, за што има големи нарушувања поради воениот конфликт.
Според српскиот претседател, Србија има доволно количини на пченка, за брашно тип 500, за леб и за сè друго и нема да го ограничи извозот.
„Во овој момент нема да го ограничуваме извозот, ја следиме состојбата и подготвивме мерки да го ограничиме извозот на пченката и пченицата на 20 отсто, доколку за тоа има потреба, но во овој момент за тоа нема потреба“,
рече Вучиќ.
Претседателот Пендаровски, во синоќешното гостување на Сител, го поздрави потегот на Србија. Тој рече и дека директно го прашал шефот на српската дипломатија, Никола Селаковиќ, при неговата неодамнешна посета на Скопје, дали Србија може да ѝ даде жито на Македонија. Селаковиќ, како што посочи, му рекол дека за тоа мора да разговара со претседателот Вучиќ.
„Пред да влезам во студиото ја видов изјавата на српскиот претседател дека С Македонија барала 50 000 тони пченица и 25 000 тони пченка и дека ќе ни ги дадат тие количества. Која е големината на тој потег? Србија пред пет дена, на првиот или вториот ден кога почна руската интервенција во Украина, донесе одлука да го забрани извозот на сите витални стратешки производи. Од пред 2,5 години Руската федерација ја надмина Украина според продукцијата на пченица на светско ниво и Србите ги имаат тие конекции од претходно како неутрална земја“,
рече Пендаровски.
Од ВМРО-ДПМНЕ велат дека се покажале вистинити предупредувањата од партијата за алармантното ниво стокови резерви.
„Откако излеговме со сознанија дека има недостиг на стокови резерви, Ковачевски, Бесими и Битиќи експресно ги демантираа ваквите информации кои сега се покажаа за точни. Иако уверуваа дека стоковите резерви се стабилни и полни, вчера, соседна Србија ни откри дека Владата на Македонија испратила барање за испорака на вкупно 75 000 тони пченка и пченица. Владата ја донесе Македонија во опасност и веднаш треба да одговори дали стоковите резерви биле празни и поради тоа не се интервенираше на пазарот?! Ако ја земеме за веродостојна и изјавата на Пендаровски дека уште пред пет месеци имале сознанија за војната во Украина, што чекале до сега и зошто не обезбедиле неопходни резерви? Владата треба да одговори и зошто дозволи цените на брашното и лебот да се зголемат и не презема ништо против тоа“,
изјави портпаролката на ВМРО-ДПМНЕ, Марија Митева, на денешната прес-конференција.
Претседателот на Групацијата за мелничко-пекарска индустрија во Стопанската комора на Северна Македонија, Горан Малишиќ, пред неколку дена изјави за МИА дека граѓаните не треба да стравуваат и да креваат паника, зашто стопанствениците ќе обезбедат доволно пченица и брашно.
Според Малишиќ, санкциите кон Русија од македонска страна би биле катастрофални ако ние како држава не би имале други пазари за суровини, како што се Србија, Унгарија, Романија и Бугарија.
„Не треба да се дига паника кај населението до тој степен, луѓето треба да бидат сигурни дека нашите стопанственици ќе обезбедат доволни количини на пченица и брашно за потребите на граѓаните, а исто ги уверувам и дека Владата ќе најде начин да ги заштити. Зголемениот трошок за набавка на леб за едно семејство на месечно ниво е најмал во споредба со зголемувањето на цените на енергенсите, електричната енергија, цигарите и сите други производи кои се зголемија вртоглаво во последниот месец“,
вели Малишиќ.
ПОВРЗАНИ ВЕСТИ:
Бектеши смирува: Ќе нема ценовни шокови, имаме доволно стокови резерви