Талат Џафери, кој едвај беше избран за претседател на деветтиот парламентарен состав, треба да ја закаже конститутивната седница на десеттиот состав, за која најавува дека ќе помине во најдобар ред, односно дека нема шанси за „реприза“ на настаните од 2017 година
Новиот собраниски состав, кој ќе биде избран на 12 април, треба да се конституира најдоцна до 3 мај годинава, што би значело околу тригодишнината од завршувањето на конститутивната седница на парламентот кој се распушти пред десетина дена, а беше избран на 11 декември 2016 година.
По вонредните избори на 12 април, првата седница на десеттиот собраниски состав се очекува да ја закаже досегашниот прв парламентарец Талат Џафери, кој беше избран на чело на законодавниот дом на 27 април 2017 година, кога конечно заврши тогашната конститутивната седница, што се одолговлекуваше близу четири месеци. Потоа, Џафери, ако биде избран за пратеник и во новиот состав, би можел да претседава со седницата до нејзиното завршување, односно до изборот на негов наследник или евентуално до неговиот реизбор. Другата варијанта е претседавањето да го преземе највозрасниот пратеник.
Според Уставот, парламентот треба да се конституира најдоцна 20 дена по одржувањето на изборите, што во случајов би значело до 2 мај годинава. „Критичниот“ датум – 27 април би бил 15 дена по одржувањето на изборите, што значи дека влегува во уставно предвидениот рок во кој може да почне конститутивната седница.
Во случај досегашниот претседател на парламентот Талат Џафери да не закаже дотогаш седница, новоизбраните пратеници сами се состануваат на 21. ден (3 мај) и тогаш со конститутивната седница би претседавал највозрасниот од новоизбраните пратеници или некој од следните пратеници според возраст, кој прв ќе прифати да ја води расправата.
Опструкции
Конститутивната седница на деветтиот пратенички состав, кој е во заминување, почна на 30 декември 2016 година, кога единствено беа верификувани мандатите на новоизбраните пратеници. Потоа, поранешниот спикер Трајко Вељаноски (ВМРО-ДПМНЕ) речиси четири месеци го одолговлекуваше продолжението на седницата, која заврши дури на 27 април 2017 година. Тогаш Џафери (ДУИ) конечно беше избран на чело на новиот парламент, така што, по „импровизираното гласање“ на пратениците од новото владејачко мнозинство, следуваше насилната драма што се одигруваше во собраниската зграда, откако демонстрантите успеаја да влезат внатре.
Вељаноски, на вчерашното судско рочиште за организацијата на т.н. „крвав четврток“ во парламентот, се изјасни дека не чувствува вина за случувањата пред три години. Вељановски беше на чело на парламентот цели осум години, во три мандати, а обвинителката Вилма Русковски посочи денеска дека на 27 април 2017 година тој не постапувал согласно со собранискиот Деловник. Меѓу другото, и затоа што дозволил во собраниската сала да се пее албанската химна, како поттик за насилствата што следуваа.
Овој парламентарен состав, во рамки на процесот „Жан Моне“ не успеа да да ги донесе измените во собранискиот Деловник, чија главна цел беше да се превенираат настани како „крвавиот четврток“. Со измените во Деловникот требаше да се ограничи времетраењето на конститутивната седница – на два-три дена. И покрај тоа, Џафери во деновите пред распуштањето на парламентот изјави дека тоа што тој ќе претседава со конститутивната седница на идниот парламент е гаранција дека нема да се повторат настани како при неговиот избор за спикер во 2017 година.
Формирање на новата влада
По конституирањето на десеттиот парламентарен состав и изборот на прв парламентарец, ќе почнат да течат роковите за формирање на новата влада. Според Уставот, претседателот на државата е обврзан во рок од 10 дена од конституирањето на Собранието мандатот за состав на владата да го довери на кандидат на партијата, односно партиите што имаат мнозинство во Собранието. Мандатарот во рок од 20 дена од денот на доверувањето на мандатот на Собранието поднесува програма и го предлага составот на владата.
По претходните избори, на 11 декември 2011 година, владата на СДСМ и на ДУИ беше избрана дури во почетокот на јуни 2017 година. Освен одолговлекувањето на конститутивната седница на парламентот, причина за тоа беше и тактизирањето на тогашниот претседател на државата Ѓорге Иванов, кој одбиваше да му го даде мандатот за формирање влада на Зоран Заев, односно бараше „гаранции за зачувување на унитарноста на државата“.