Главните преговарачи пристигнуваат во европската престолнина само два дена по неуспешниот дијалог за решение на проблемот со регистарските таблички кој се одржа меѓу српскиот претседател Александар Вучиќ и косовскиот премиер Албин Курти во посредство со шефот на европската дипломатија Жозеп Борел
Главните преговарачи на Белград и Приштина, Петар Петковиќ и Бесник Бислими, денеска во Брисел ќе се сретнат со специјалниот претставник на Европската Унија за дијалог меѓу Косово и Србија, Мирослав Лајчак, јави српскиот јавен сервис РТС.
Сепак, останува нејасно дали српскиот и косовскиот претставник ќе се сретнат одделно со специјалниот претставник за дијалог или ќе има заедничка средба.
Главните преговарачи пристигнуваат во европската престолнина само два дена по неуспешниот дијалог за решение на проблемот со регистарските таблички кој се одржа меѓу српскиот претседател Александар Вучиќ и косовскиот премиер Албин Курти во посредство со шефот на европската дипломатија Жозеп Борел.
За неуспешната средба што се случи на 21 ноември, Борел одговорноста ја префрли на косовската страна. Косовскиот премиер, пак, изјави дека посредниците на ЕУ „се откажале“ од нивниот предлог за нормализирање на односите меѓу Косово и Србија.
Но, по враќањето од Брисел, шефот на косовската влада Албин Курти најави дека го одложува изрекувањето на казните за 48 часа откако тоа од него беше побарано од американската страна, која исто како и ЕУ изрази разочарување оти лидерите на Косово и Србија не успеале да постигнат договор за решение на актуелната криза во Косово.
Курти вчера изјави дека очекува оти е потребно вложување максимални напори за прашањето за регистарските таблички да се реши во рок од 48 часа, а со тоа да се најде решение за целосна нормализација на односите со Србија до март 2023 година, што, како што тврди, била целта на разговорите во Брисел.
Тензиите меѓу Приштина и Белград настанаа токму поради регистарските таблички.
Регистарските таблички издадени од српските власти со ознаки КМ (Косовска Митровица) Косово ги смета за нелегални, но досега беа толерирани во четирите општини со српско мнозинство на северот на Косово – Северна Митровица, Лепосавиќ, Звечан и Зубин Поток.
Табличките со ознаки РКС (Република Косово), на кои инсистира владата на Косово, пак, не се прифатливи за Белград и Србите на северот на Косово.
Ситуацијата меѓу двете страни се искомплицира откако на 5 ноември припадниците на српската заедница на северот ги напуштија косовските институции, спротивставувајќи се на одлуката на косовските власти за издавање предупредувања за пререгистрација на возилата.
Косово и Србија постигнаа договор за слобода на движење во 2011 и 2016 година, кој вклучуваше пререгистрација на регистарските таблички од српски на косовски.