Процесот на пристапување кон ЕУ треба да биде национален проект, а не проект на една политичка партија или коалиција, порача евроамбасадорот Дејвид Гир, коментирајќи го извештајот за напредокот на земјата
Владеењето на правото е почетокот и крајот на процесот на пристапување кон ЕУ и ќе остане наш фокус низ целиот процес, порача денеска евроамбасадорот Дејвид Гир на заедничката прес-конференција со вицепремиерот за европски прашања, Никола Димитров, посветена на новиот извештај за напредокот на земјата.
Гир порача дека усвојувањето на законодавството согласно европските стандарди мора да продолжи.
Додаде дека процесот на пристапување кон ЕУ треба да биде национален проект, а не проект на една политичка партија или коалиција. .
„Усвојувањето на законодавството согласно ЕУ стандардите мора да продолжи. Тоа е нешто на што сите треба да се фокусираме, административниот капацитет мора да е на место да испорачува, а институциите да се оперативни. Унапредувањето на правото е критична област. Ефективно владеење на правото е неопходно не само за да се обезбеди заштита на граѓаните, туку и за да дојдат инвеститори. Ако тие знаат дека постои правна сигурност и дека можат да се потпрат на системот, ќе се охрабрат и ќе дојдат, ќе ги реализираат вложувањата“,
рече Гир.
Тој се осврна на неколку точки од новиот извештај каде, меѓудругото се наведува дека земјата постигнала добар напредок во однос на борбата против корупцијата и во оваа област има одредено ниво на подготвеност. Сепак, се вели дека таа е распространета во многу области и треба да се обезбеди попроактивен пристап од сите чинители вклучени во спречувањето и борба против корупцијата.
„Северна Македонија има постојан прогрес како во клучните реформи во судството, корупцијата и борбата против организираниот криминал, но тој момент треба да се задржи“,
рече евроамбасадорот.
Претходно, при презентирање на извештајот во Брисел, еврокомесарот за проширување, Оливер Вархеји рече дека очекува првата меѓувладина конференција со Северна Македонија да се одржи во декември.