Еврокомесарот Вархеји порача дека Северна Македонија треба да се посвети на дијалогот со Бугарија со цел да се надминат недоразбирањата
Целта на Европската комисија, како и на германското претседателство, е првата меѓувладина конференција со Северна Македонија да се одржи до крајот на оваа година, порача еврокомесарот за проширување, Оливер Вархеји, на презентацијата на годишните извештаи за земјите опфатени со процесот на проширување на ЕУ.
„Сѐ уште целиме на одржување на првите меѓувладини конференции под германско претседателство (до 31 декември, н.з.), тоа е пораката што ја пренесов до Европскиот парламент и тука, уште имам надеж дека е возможно“,
изјави Вархеји, одговарајќи на новинарско прашање.
Европската комисија ги поднесе предлог преговарачките рамки за Северна Македонија и за Албанија до земјите членки на почетокот на летото. Според календарот на германското претседателство, земјите членки треба во ноември да ги усвојат, со евентуални измени.
За Северна Македонија главен проблем се барањата на Бугарија за додавање елементи поврзани со отворените прашања што ги имаат Скопје и Софија.
Еврокомесарот Вархеји денеска изјави дека им порачал на претставниците на македонската Влада да се посветат на дијалогот со Бугарија со цел да се надминат недоразбирањата.
„Работиме рака под рака со бугарските и македонските власти, ги примив министерот за надворешни работи и вицепремиерот минатата недела и ги охрабрив да се ангажираат со нивниот сосед, бидејќи станува збор за заемен интерес да се изнајде решение кое е прифатливо за двете страни“,
рече Вархеји.
Коментирајќи го извештајот за напредокот на земјта, Вархеји истакна дека Северна Македонија одржала стабилен напредок во делот на реформите, посебно владеењето на правото и борбата против корупцијата и организираниот криминал.
Презентацијата на извештаите за земјите од Западен Балкан денеска првпат се пренесуваше со превод на локалните јазици од регионот, меѓу кои и на македонски јазик.