Жан Митрев, сопственик на истоимената приватната Клиника чие лекување на ковид-19 пациентите беше цел на новинарско истражување прво на Истражувачката репортерска лабораторија (ИРЛ), а потоа и формална истрага на Јавното обвинителство, денеска ја „изведе“ својата одбрана пред јавноста. Вели, наводите во документарецот „Нечиста крв“, кои покренаа реакција од институциите, се невистинити
ИРЛ во својот документарец, во кој се емитуваат и делови од интервјуто со самиот Жан Митрев, откри дека методот на хемофилтрација кој ги користела Клиниката „Жан Митрев“ практично е на ниво на клиничка студија и дека приватната болница не ги пријавувала бројните интрахоспитални инфекции до надлежните, иако била обврзана да го прави тоа
Во периодот од јуни 2020 до февруари 2022 г. во Клиничката болница „Жан Митрев“ се лекувани вкупно 1 738 пациенти со ковид-19. Од нив, само 625 пациенти (35,9%) биле третирани со хемофилтрација. Ова се дел од податоците кои Жан Митрев, доктор но и сопственик на истоимената приватна Клиника, ги употреби во својот јавен настап насочен контра медиумскиот но и интересот на Јавното обвинителство во работењето на неговата болница.
Поводот за денешниот настап е стар околу четири месеци. На средината на јули Истражувачката репортерска лабораторија објави новинарски документарен филм во кој беа приложени изјави од сведоци, документи, ставови од институции па и од самиот Жан Митрев – дека приватната болница дебело наплаќала за т.н. хемофилтрација при лечење на болни од ковид-19, а таа метода ем била клиничко испитување, ем не била пријавена пред надлежната Агенција за лекови (МАЛМЕД).
Денеска, Митрев тврдеше дека никогаш не тврдел дека имаат лек за коронавирусот, туку дека тие само ги лекувале компликациите кои настануваат од вирусот. Во тој контекст, методот на хемофилтрација бил ист како и претходно, кога започнале со употреба во 2008 г. односно тешко болните биле лекувани на ист начин и немало промена на пристапот на лекување. Ги демантираше тврдењата дека овој метод на лекување е неефикасен.
„Резултатите велат дека имаме повеќе од 50% преживеани, само оние кои се подложени на хемофилтрација. Само 35% од вкупниот број на пациенти се ставени на третман хемофилтрација. Воопшто не држи тезата дека со хемофилтрацијата сме направиле бизнис и сме ги навеле луѓето да прават хемофилтрација. Тоа беше шанса повеќе да преживеат, инаку тие пациенти ќе беа сите 100% мртви“,
кажа д-р Митрев.
Примената на хемофилтрација во лекувањето на компликации кај пациенти со коронавирусот според Митрев се одвивало строго според пропишаните индикационите подрачја дадени во упатството за работа од производителот, а истото вели било одобрено согласно американската и европската легислатива. Од 2008 наваму, вели се правеле од 50 до 200 хемофилтрации на годишно ниво, а од почетокот на пандемијата, направени се околу 620 хемофилтрации.
„Според деталните болнички извештаи во Жан Митрев клиника биле хоспитализирани вкупно 1 738 третирани пациенти, од кои 1 296 преживеале, со што стапката на успех во третманот на пациентите со компликации од Ковид-19 во Жан Митрев клиника изнесува 74,6%. Од пациентите кои се третирале од ковид-19 во Клиника Жан Митрев, 294 пациенти или 47% претходно биле хоспитализирани во други болнички установи“,
вели д-р Митрев.
За разлика од денешните тврдења на Митрев, во документарниот филм на ИРЛ „Нечиста крв“ беа презентирани сведоштва и други докази во прилог на тоа дека пациентите биле приклучувани на хемофилтрација порано од препораките на производителот на опремата и дека хемофилтрацијата, во ниту една земја, не била одобрена за лекување на ковид-19.
Во интервјуто емитувано во документарецот, самиот Жан Митрев е соочен со препораките на американската ФДА – дека хемофилтрација треба да се вклучи подоцна отколку што тоа е правено во неговата клиника.
„Ние први во болницата почнавме уште многу одамна да го испитуваме интерлеукинот како еден од главните медијатори на активација на инфекција во организмот. Ние тоа го воведовме во секојдневната пракса. И спречувавме да дојде до сепса. Ако веќе сепсата дојде, тогаш и хемофилтрацијата има многу поограничени можности. Во вашето прашање…
ИРЛ: Значи, сметате дека хемофилтрацијата може да се дава пред да настапи ‘цитокинска бура’?
Апсолутно. Тоа е правата индикација… Ако вие го фатите механизмот пред да настане, тогаш е вистинската индикација за хемофилтрација. Тоа го гледаме ние во секојдневната наша пракса.
ИРЛ: Ако сметате дека препораката на ФДА, бидејќи Вие…
Не, не. ФДА само го одобрува тој третман. Таа не вели кога да го вклучите.
ИРЛ: Апсолутно вели кога, вели дека се користи во исклучителни ситуации кога состојбите се тешки.
Да речеме за хемофилтрација за ковид пациенти по година дена се објави во Германија дека има ефект.
ИРЛ: Каде? Дали може линк да ни дадете?
Па, имаше на вести некаде, во Берлин беа објавиле дека хемофилтрацијата е примена кај ковид пациенти. И ако гледавте вести од странство, секоја интензивна нега речиси имаше хемофилтрација покрај секој пациент“,
тврди доктор Жан Митрев.
Според Митрев, наводите на ИРЛ биле „лажни и исценирани“. Со нив се фрлило сомнеж на работата на клиниката и кажа дека ќе дојде време кога ќе покаже од каде доаѓа овој „оркестриран напад“. Кажа и дека веќе поднеле тужба за документарната сторија (судот веќе го одби барањето на Жан Митрев привремено да се повлече документарниот филм)
„Не заслужуваме ваков третман и имаше коментари кои не држат место. Јас короната не ја донесов во Македонија. Процентуално во нашата клиника имаше најмногу излечени пациенти. Ниту еден пациент не беше излажан. Кога постои ваков оркестриран напад, со толку лажни вести, треба да се прашате кој има корист од сево ова“,
истакна д-р. Митрев.
Митрев вели дека тој и Клиниката се мета на напади и малтретирање, но и дека болницата има 100 отсто загуби од сторијата, за што тој бил принуден да подигне кредит од 4 милиони евра за да ја задржи болницата. Тој се надева дека институциите ќе ја завршат својата работа до крај и дека ќе ги објават вистинските резултати, иако оваа „акција“ на медиумите, како што тој ја нарече, нанела голем удар врз работењето на болницата.
„Некој да каже јас ќе одам да се оперирам, а таму се прават експерименти. Каков е тој збор. Тоа е најголема штета. Ова во новинарството можам да го споредам со атомска бомба за некому да му наштетите. Ако е тоа новинарството да направите таков говор на омраза и во старт да направите таква штета. Секогаш сум спремен пред новинарите да добиете се, за секој пациент. Меѓутоа како ние да се одбраниме од зборовите убијци, експерименти и такви терминологии“,
вели Митрев.
Во однос на обвинувањата за профитерство, Митрев вели дека во 2020 г. на пациентите им биле вратени над 2 милиони евра, додека пак во 2021 г. се вратени над 3.2 милиони евра од аванси. Вели третманот со хемофилтрација чинел 3 000 евра, додека пак болничко лекување за еден ден изнесува 600 евра, па затоа вели доколку сакал да профитира не би го користел тој метод.
„Ниту половина евро, ниту пола денар немаме земено повеќе од пациентите за време на пандемијата дури ниту поради погрешна финансиска пресметка. За какво профитерство се зборува овде, доколку сме сакале да направиме нешто зар ќе им вратевме на пациентите 5 милиони и 200 илјади евра во време на Ковид. Срам да им е на сите кои нè обвинуваат за профитерство“,
вели д-р Жан Митрев.
Бројките од завршните сметки на Клиничката болница Жан Митрев, сепак, говорат поинаку. Во 2019, последната пред-пандемиска година, болницата остварила профит од околу 4 милиони евра. Во првата година од пандемијата, профитот на Жан Митрев расте двојно, на 8,1 милиони евра. Во текот на ланската, 2021 година, клиниката направила уште поголем профит – 9,2 милиони евра.
Жан Митрев денеска тврдеше и дека клиниката не ги криела интрахоспиталните инфекции, како што се тврдеше во документарниот филм на ИРЛ. Бактеристите инфекции за време на ковид кризата, пак, биле поради имунодефицитната состојба на пациентите како последица на прекумерно користење на кортикостероиди и антибиотици.
„Во „Жан Митрев клиника“ никој не криел интрахоспитални инфекции, за време на пандемијата најголем број од инфекциите, пациентите веќе ги имаа со себе и беа третирани соодветно“,
посочи д-р Жан Митрев.
Збор против збор, од Центарот за јавно здравје веќе изјавија дека Клиниката „Жан Митрев“ не пријавила ниту една интрахоспитална инфекција за време на пандемијата. А тоа е институцијата до која секоја болница, било приватна или државна, мора да ја пријави секоја инфекција. Тој став беше содржан во документарниот филм „Нечиста крв“.
Документарниот филм на ИРЛ беше објавен на средината на јули, а веќе на 18-ти истиот месец Јавното обвинителство отвори предистрага. На почетокот на август, пак, предистрагата напредуваше во истрага што говори дека обвинителството има сериозни сомненија за сторени кривични дела. Како мерка на претпазливост, Обвинителството побара а судот одобри да се одземе патната исправа на Жан Митрев поради опасност од бегство. Докторот достави и гаранција од еден милион евра дека нема да избега во рамки на истрагата што се води против него за кривичното дело измама.
На спротивна линија од она што денеска го говореше Жан Митрев засега е и министерот за здравство, Беким Сали. Кон крајот на јули, тој кажа дека хемофилтрацијата во клиниката се користела како „волшебен“ третман за било каков проблем во организмот, но и дека финалното објаснување за тоа кога се користел методот ќе го даде стручна комисија. Сали изјави и дека целиот третман треба да се анализира од експерти, лекари кои цел живот тоа го работат. Тоа се групи формирани од четири клиники: Кардиохирурија, Инфективна клиника, Интензивна и Нефрологија кои го анализираат секој поединечен случај и мора да напишат извештај на секој поединечен случај.