Филков вели дека во одлуката на судијата Пајазити е отсликано сето она што го поткопува правниот систем во државата
Министерот за правда Игор Филков смета дека одлуката на судијата Пајазит Пајазити да биде во куќен притвор поранешниот припадник на ОВК, Блерим Рамадани, кој потоа избега од државата, е погрешна и во спротивност на досегашната пракса.
Филков вели дека ова прашање треба да биде приоритет посочувајќи дека веќе 10-ина дена се чека Судскиот совет да одлучи дали Пајазити постапил согласно законите.
„Одлуката на судијата не само што е погрешна туку е во спротивност на досегашната пракса. А нашата цел е целосна примена на законите во државата за секого без исклучок. Ова прашање треба да има приоритет, а веќе 10 дена го чекаме Судскиот совет да одлучи дали судијата Пајазити постапил согласно законите, што не е така и доколку се разгледаат сите докази, аргументи и факти ќе биде констатирано дека не, не одлучил правилно“,
вели Филков во интервју за „Фактор“.
Тој вели дека во одлуката на судијата Пајазити е отсликано сето она што го поткопува правниот систем во државата и против кое, како што вели, безусловно ќе се бориме да го смениме.
„Затоа ни се потребни темелни реформи. Оваа постапка и оваа одлука укажуваат дека мора да спроведеме реформски процеси за да изградиме правен систем каде ќе има еднаква правда за сите. Систем каде ќе доминираат вистински професионалци, законски и правни принципи, а не други интереси или, пак, уште полошо партиски послушници“,
додава Филков.
Во однос на најавените реформи за Судскиот совет, Филков вели дека целта е да се создаде целосно независно судско тело кое ќе носи аргументирани и законски и правно издржани одлуки.
„Започнавме со тоа независноста на ова тело да биде постигната не со предлозите од Владата, од Парламентот, од претседателот, туку напротив, предлозите за нови членови да дојдат од самите судии и обвинители, самите да ги изберат најдобрите и најпринципиелните меѓу нив. И затоа дадовме време Советот односно самите со гласање или каков и да е механизам, да ги изберат своите членови. Но, од нивна страна сè уште нема никаков одговор, ниту некаква реакција, ниту одлука“,
вели Филков.
Поранешниот припадник на Ослободителната војска на Косово (ОВК), Блерим Рамадани, во јули беше уапсен на косовско-македонската граница врз основа на потерница од Интерпол издадена на барање од Србија.