Во периодот што претстои се очекува стабилизација на ширењето на ковид-19, но тешко е да се очекува дека вирусот целосно ќе исчезне, порача министерот за здравство Венко Филипче.
Тој рече дека во наредните два месеци се очекува најзначајно намалување на ширењето, повикувајќи се на научни претпоставки подготвени од Комисијата за заразни болести направени врз основа на досегашните домашни и меѓународни трендови, како и објавени студии и сознанија.
„Согласно сегашната состојба, утрово на состанокот на Комисијата беше дискутирано дека во следните два месеци очекуваме најзначајно намалување на ширење на вирусот. Индикациите на кои се темелат овие претпоставки се следните: најсилно изразени посткарантивни ефекти кога силно беше ограничено движењето на граѓаните; затворените граници и неможноста да имаме импортирани случаи значи само случаи со локална трансмисија кои се под максимална контрола; како и тоа што вообичаено ваков тип на белодробни епидемии траат помеѓу 8 и 12 недели – сега кај нас е периодот на 11. недела. Нешто што исто така очекуваме да придонесе во смисла на ослабување на вирусот и намалување на преносот се и високите температури“,
рече Филипче.
Тој им порача на граѓаните дека може да бидат спокојни, но и дека почитувањето на трите клучни препораки (носење заштитна маска, држење дистанца и дезинфекција на раце) е исклучително важно.
На прашање дали предлагаат дека следните два месеци се поволни за избори, министерот ги повтори научните претпоставки зошто периодот пред нас ќе биде мирен и епидемијата ќе биде под целосна контрола, како и ризиците кои може да ја влошат состојбата.
*Поврзани вести:
Ковид-19: Нови 10 случаи од 189 тестирани, 5 излечени пациенти и 1 починат
Филипче: Новите пациенти се заразиле со ковид-19 на погреб и на семеен настан