Препораките што ги утврди Комисијата за заразни болести ќе бидат разгледувани на денешната седница на Владата
Министерот за здравство Венко Филипче презентира план за постепено олабавување на рестриктивните мерки кои беа преземени за справување со коронавирусот, кој, како што рече, ќе се одвива во неколку фази.
По денешниот состанок на Комисијата за заразни болести, Филипче рече дека состојбата со епидемијата во земјава е оценета како стабилна.
Олеснувањето на рестрикциите, како што рече, е врз основа на повеќе критериуми, кои ги зема предвид и Светската здравствена организација. Филипче ги образложи, како што рече, најважните три критериуми:
- Дали ситуацијата со епидемијата е под контрола: Основен индикатор дали состојбата е под контрола е репродуктивниот број, кој треба да е под 1, а кај нас подолго време е меѓу 0,6 и 09, што значи дека еден пациент заразува помалку од еден друг, во просек.
- Дали здравствениот систем успева да ги изменаџира состојбите: Подолг период во болниците имаме капацитети кои се слободни и мал број пациенти на респиратор. Капацитетите предвидени за лекување ковид-19 во ниту еден момент не беа искористени во целина, ниту на Клиниката за инфективни болести, каде што сега има четириесетина пациенти од 110 кревети и уште 70 во мобилната болница.
- Дали системот за надзор на јавното здравство може да ги открие и да управува со случаите и нивните контакти: Анализите покажа дека во нашиот случај над 90 проценти од случаите имаат епидемиолошка поврзаност.
Предлог-планот што Министерството за здравство, што ќе биде доставен до владата предвидува:
Оваа недела да се вратат во функција центрите за едукација и обука; седници на органи на управување; автошколите; испитните центри; тренинзи на отворено за индивидуални спортови; обложувачници – преку шалтер, без угостителска дејност, затворени трговски центри – без угостителска дејност; центрите за рехабилитација на слух, говор и глас.
Следната недела се планира да бидат отворени угостителските објекти со послужување; тренинзи на отворено за колективни спортови;
Третата недела се предвидува да биде препорачано отворање на игрите на среќа во казина; автомат-клубови; спортски тренинзи на затворено и фитнес-клубови; хотелски објекти.
Меѓу секоја од фазите, како што рече Филипче, ќе се прави епидемиолошка анализа, а економските оператори се обврзани да ги почитуваат мерките за дезинфекција, носење заштитна опрема, одржување дистанца.
„Тоа значи дека постепено животот го враќаме во нормала, работните процеси и стопанството. Но тоа подразбира и одредени протоколи што треба да се почитуваат и редовни епидемиолошки анализи за состојбата со коронавирусот“,
рече Филипче.