Законските измени вклучуваат: задолжително носење маска на отворено, забрана за групирање во домови на семејни прослави или да може да се примат најмногу четири луѓе, забрани и групирање на повеќе од четири лица на јавен простор по 22 часот, односно да се забрани групирање по паркови, јавни површини или каде било на отворено
Измените во Законот за заштита од заразни болести веќе се во собраниска процедура и се очекува за нив да се расправа веќе следната недела, најави денеска од Штип, министерот за здравство Венко Филипче, додавајќи дека тие ќе се носат по скратена постапка, за да може да се воведат новите мерки кои ги предлага Комисијата за заразни болести за спречи ширењето на коронавирусот.
„Ваквата ситуација практилно е изнудена да мора да се интервенира во законот, поради тоа што дел од уредбите, препораките за носење на заштитна опрема во надворешна средина се ставени во уредбата со законска сила, којашто беше изгласана и донесена на крајот на вонредната состојба. Ова е најдобриот начин да имаме мерка која е ефикасна и ќе може да се контролира и да се спроведе“,
изјави Филипче.
Во врска со недостигот на лекари и медицински персонал на инфективните одделенија низ земјава, Филипче објасни дека тој проблем се надминува уште од почетокот на кризата со системот на ротации на лекарите и медицинскиот персонал од други одделенија.
„Во еден одреден период, пред неколку месеци имавме ваква слична ситуација, кога беа речиси преполнети одделенијата и сега навистина има голем притисок за прием на пациенти во болницата во Струмица, во Куманово и во Битола. Има слободни места и во Гостивар, а почнаа да се полнат капацитетите и во кавадаречката болница, каде од вчера има веќе сместено двајца пациенти“,
вели Филипче, додавајќи дека се прават секојдневни анализи и се врз основа на нив се прави системот за мобилизација на медицинскиот кадар.
Законските измени вклучуваат задолжително носење маска на отворено, забрана за групирање во домови на семејни прослави или да може да се примат најмногу четири луѓе. Предложено е да се забрани и групирање на повеќе од четири лица на јавен простор по 22 часот, односно да се забрани групирање по паркови, јавни површини или каде било на отворено.
Комисијата за заразни болести вчера најави дека е можно в понеделник до Владата да предложи нови мерки доколку трендот на зголемување на бројот на заразени со ковид-19 продолжи во текот на викендов.
Тие предвидуваат ограничување на капацитетот на луѓе во јавниот превоз до 50 отсто, целосна забрана за секакви настани и работното време на сите економски субјекти да биде до 23 часот.