Владата и претставници на средношколците заеднички ќе го усовршуваат моделот на настава. Сојузот на средношколците бара учебната година да почне со комбинирана настава, а не само онлајн
Премиерот Спасовски, вицепремиерката Царовска и министрите за образование и здравство, Адеми и Филипче денеска седнаа на заедничка маса со средношколците, откако тие најавија протести или бојкотирање на наставата.
„На средбата претставниците на Сојузот на средношколците беа детално запознаени со одлуката на Владата за моделот според кој ќе се организира и спроведува наставата во основното и средното образование во услови на КОВИД-19, која е донесена врз основа на стручните анализи и препораки на Комисијата за заразни болести“,
информираат од Владата.
Сојузот на средношколците бара учебната година да почне со комбинирана настава, а не само онлајн, како и нивна поголема вклученост во подготовките за организација и спроведување на прифатениот модел за да се постигнат најдобри решенија во интерес на учениците и наставниците.
Од Владата информираат дека министерот за здравство Филипче ги поканил средношколците да присуствуваат на состанок на Комисија за заразни болести на кој детално ќе се запознаат со состојбата со ковид-19, но и за мерките за заштита од заразата кои се во интерес на заштитата на јавното здравје.