По препораките на Комисијата за заштита од заразни болести, Владата одлучи новата учебна година да започне онлајн, со два исклучоци. Првиот е учениците од 1 до 3 одделение наставата да може да ја следат со физичко присуство, во согласност на родителите.
Вториот исклучок е паралелките со мал број ученици да можат исто така да следат настава во училиштата. По нивна иницијатива, ќе им се дава согласност, првин во рамки на министерствата за здравство и образование.
Онаму, каде што ќе се организира физичка настава, во основните училишта часовите ќе траат по 30 минути, а во средните – 35 минути. Министерот за образование Арбр Адеми вели дека ќе мора да следуваат законски измени, за да се остави флексибилност за организирање на наставата.
Без разлика на можноста за физичко присуство, за сите ученици ќе биде достапна и онлајн настава, а родителите ќе имаат можност да изберат каков начин на настава да следат најмалите ученици до трето одделение.
„Порфункционира националната платформа eduino.gov.mk, каде се снимаат видео лекции, така што во периодот што следи ќе има теми и материјали кои се во согласност со наставната програма која треба да се обработи во првото полугодие од новата учебна година. Во меѓувреме, се работи за една и единствена национална платформа, која ќе биде во функција на сите училишта за да ја организираат наставата преку средствата за електронска комуникација, но има консензус да се обезбедат ИТ уреди за секоја училница, но и за децата кои потекнуваат од социјално загрозените семејства. Ова е значајна и тешка одлука, на која се потребни консултации, каде што се зема предвид и здравствениот аспект, но и квалитетот на образовниот процес. Се очекува одговорен пристап од сите кои се вклучени во образовниот процес, за да не дојде до влошување на епидемиолошпката состојба“,
кажа министерот за образование Арбр Адеми.
Министерот за здравство, Венко Филипче истакна дека потребна е максимална внимателност да се намали ризикот од ширење на вирусот, а образовниот кадар, семејствата и учениците да бидат безбедни. Онаму, каде што ќе има одлука за настава со физичко присуство, доколку има некаков сомнителен случај, дете или наставник со температура, ќе се направи соодветен пристап од епидемиолог кој ќе го процени тоа.
„Во училниците не треба да има повеќе од 20 деца, да има 1.5 метри дистанца, да носат маски и наставникот да биде постојано со нив. Потоа, да не излегуваат за време на одморот и почетокот на различните одделенија да биде со 10 минути разлика, за да не се сретнуваат повеќе групи на влезот или излезот на крајот на наставата“,
додаде Филипче.