Мораме да најдеме излез од оваа криза. Дадовме предлог за излез од кризата, тие треба да го разгледаат. Ние работиме на добро решение, рече Борел пред состанокот на министрите за надворешни работи на Европската Унија
Односите меѓу Србија и Косово ќе бидат во фокусот на дискусијата посветена на состојбите на Западен Балкан, на состанокот на министрите за надворешни работи на земјите членки на Европската Унија (ЕУ) што ќе се одржи денеска.
Според најавата, високиот претставник на ЕУ за надворешна политика и безбедност, Жозеп Борел, ќе ги информира шефовите на европската дипломатија за ќорсокакот во дијалогот меѓу Косово и Србија и за средбите што ги имаше со премиерот на Косово, Албин Курти и со српскиот претседател Александар Вучиќ кон крајот на минатата недела.
Борел потврди дека доставил предлог до Србија и Косово за решение на настанатата криза.
„Мораме да најдеме излез од оваа криза. Дадовме предлог за излез од кризата, тие треба да го разгледаат. Ние работиме на добро решение“,
рече Борел пред состанокот на министрите за надворешни работи на Европската Унија.
Се очекува на крајот од дискусијата шефовите на дипломатиите на ЕУ да го повторат повикот за конструктивен ангажман на страните за надминување на предизвиците и намалување на тензиите.
Тие, исто така, ќе бараат напредок во процесот на дијалог кон постигнување сеопфатен, правно обврзувачки договор за нормализирање на односите меѓу двете страни.
Односите меѓу Белград и Приштина се затегнати поради неодамнешната одлука на косовската влада да започне со спроведување на одлуката за укинување на регистарските таблички издадени од српските власти за возилата што главно ги користат Србите на северот на Косово.
Претставниците на меѓународната заедница побараа од официјална Приштина да го одложи спроведувањето за десет месеци, што косовските власти го одбија.
Разочарување од оваа постапка изразија и претставниците на Европската Унија (ЕУ) и на Соединетите Американски Држави (САД).
Поради заладените односи, немаше нова средба меѓу косовскиот премиер и српскиот претседател, иако ЕУ вети дека дијалогот ќе добие нова динамика и дека лидерите ќе се среќаваат еднаш месечно.
Во меѓувреме, потврдено е постоењето на таканаречениот германско-француски план за дијалог, но страните имаат дијаметрално различни позиции за овој план.
Германскиот канцелар Олаф Шолц и претседателката на Европската комисија Урсула фон дер Лајен на 3 ноември во Берлин зборуваа за постоењето на таканаречениот француско-германски план. Фон дер Лајен потврди дека овој план сега е „интегриран во процесот на дијалог“.
Иако ситуацијата на Косово и тензиите создадени на север ќе бидат главна тема во делот од средбата каде што ќе се разговара за Западен Балкан, се очекува министрите да разменат мислења за влијанието на руската агресија врз Украина и регионот, како и за политичката ситуација во Црна Гора и Босна и Херцеговина.
Тие ќе разговараат и за процесот на проширување на ЕУ пред самитот ЕУ-Западен Балкан што ќе се одржи на 6 декември во Тирана.